క‌లం, స్పోర్ట్స్: టీమిండియా టీ20 కెప్టెన్ సూర్యకుమార్ యాదవ్‌ (Suryakumar Yadav)కు ముంబై జట్టు పగ్గాలు అప్పగించారు. రాబోయే సయ్యద్ ముస్తాక్ అలీ టీ20 ట్రోఫీలో అతడు ముంబై జట్టుకు నాయకత్వం వహించనున్నాడు. ఈ విషయాన్ని ముంబై క్రికెట్ అసోసియేషన్ సోమవారం అధికారికంగా ప్రకటించింది. అనుభవజ్ఞులతో పాటు యువ ఆటగాళ్లకు కూడా జట్టులో చోటు కల్పించింది. ముంబైకి నాయకత్వం వహించే అవకాశం రావడం గర్వంగా ఉందని సూర్యకుమార్ తెలిపాడు. జట్టులో అనుభవజ్ఞులు, ప్రతిభావంతులైన యువ ఆటగాళ్లు ఉన్నారని పేర్కొన్నాడు. అందరూ కలిసికట్టుగా ఆడి, ట్రోఫీని గెలవడమే లక్ష్యమని స్పష్టం చేశాడు.
ఇటీవల సూర్యకుమార్(Suryakumar Yadav)కు ముంబై రంజీ జట్టులో చోటు దక్కలేదు. మొత్తం రంజీ సీజన్‌కు అందుబాటులో ఉంటానని చెప్పినా సెలెక్టర్లు అతడిని ఎంపిక చేయలేదు. తగినంత రెడ్‌బాల్ క్రికెట్ ఆడలేదని కారణం చూపించారు. ఆ తర్వాత ఎంసీఏ ప్రెసిడెంట్స్ కప్ టీ20 టోర్నీలో ఎంఐజీ క్రికెట్ క్లబ్ తరఫున బరిలోకి దిగాడు. టీ20 ప్రపంచకప్ తర్వాత పేలవ ఫామ్ కారణంగా సూర్య భారత జట్టులోనూ చోటు కోల్పోయాడు. జూన్‌లో టీ20 ముంబై లీగ్‌లో ఆడిన తర్వాత మళ్లీ పోటీ క్రికెట్ ఆడలేదు. ఇప్పుడు ముస్తాక్ అలీ ట్రోఫీలో భారీగా పరుగులు సాధించి, భారత జట్టులోకి తిరిగి రావాలని భావిస్తున్నాడు.
మరోవైపు గాయం నుంచి కోలుకున్న సీనియర్ ఆల్‌రౌండర్ శార్దూల్ ఠాకూర్ (Shardul Thakur) ముంబై జట్టులోకి తిరిగి వచ్చాడు. ముంబై రంజీ కెప్టెన్ సిద్ధేశ్ లాడ్ మాత్రం ఈ టోర్నీకి దూరంగా ఉండాలని నిర్ణయించుకున్నాడు. భారత ఆల్‌రౌండర్ శివమ్ దూబేకు జట్టులో చోటు దక్కింది. సూర్యాంశ్ షెడ్గే, తనుష్ కొటియన్ భారత్-ఎ జట్టు తరఫున ఆడనుండటంతో ముంబైకి అందుబాటులో ఉండరు. ముంబై తన లీగ్ మ్యాచ్‌లను కోల్‌కతాలో ఆడనుంది. నవంబర్ 14న హైదరాబాద్‌తో జరిగే మ్యాచ్‌తో టోర్నీని ప్రారంభించనుంది. ఈ గ్రూపులో ఛత్తీస్‌గఢ్, గోవా, గుజరాత్, ఒడిశా, ఉత్తరాఖండ్, విదర్భ జట్లు కూడా ఉన్నాయి.
Also Read : టీమిండియా కోచింగ్ టీమ్‌లో చీలిక!
Follow Us On: Youtube
