కలం, వెబ్ డెస్క్ : ఢిల్లీ క కరోల్‌బాగ్‌లోని గఫార్ మార్కెట్, చైన్ వాలి గలిలోని పురీ ప్లాజా 13 బ్లాక్‌లోని ఒక దుకాణంలో ఒక్కసారిగా భారీ అగ్నిప్రమాదం (Delhi Fire) సంభవించింది. ప్రమాద సమాచారం అందుకున్న వెంటనే ఢిల్లీ ఫైర్ సర్వీస్ సిబ్బంది 22 అగ్నిమాపక యంత్రాలతో ఘటనా స్థలానికి చేరుకుని మంటలను అదుపులోకి తెచ్చేందుకు తీవ్రంగా శ్రమించారు. అదనపు నీటి ట్యాంకర్లు, లైటింగ్ పరికరాలను కూడా ఘటనా స్థలానికి రప్పించారు. ఈ ప్రమాదంలో ఎలాంటి ప్రాణనష్టం లేదా ఎవరికీ గాయాలు కాకపోవడంతో అధికారులు ఉపశమనం వ్యక్తం చేశారు.
కేవలం ఆస్తి నష్టం మాత్రమే జరిగినట్లు ప్రాథమికంగా గుర్తించారు. బ్యాటరీ ఓవర్‌హీట్ లేదా ఓవర్‌ఛార్జ్ కావడం వల్ల ఈ ప్రమాదం జరిగి ఉండవచ్చని పోలీసులు భావిస్తున్నారు. అగ్నిప్రమాదానికి ఖచ్చితమైన కారణాలను తెలుసుకోవడానికి ఫైర్ డిపార్ట్‌మెంట్, ఎలక్ట్రికల్ ఇన్‌స్పెక్టర్ల నుండి నివేదిక కోరినట్లు ఢిల్లీ పోలీస్ తెలిపారు. అలాగే ఇతర ప్రమాదకర లేదా మండే పదార్థాలు ఏవైనా ఉన్నాయా అని తనిఖీ చేయడానికి FSL బృందం భవనాన్ని పరిశీలిస్తుందని అధికారులు వెల్లడించారు.
