కలం, సత్తుపల్లి: మురసు తుఫాన్‌ ప్రభావంతో కురిసిన భారీ వర్షాలు, వరదల కారణంగా అశ్వారావుపేట మండలంలోని పలు గ్రామాల్లో జరిగిన నష్టాన్ని ఖమ్మం ఎంపీ రామసహాయం రఘురామ్ రెడ్డి (MP Raghuram Reddy), ఎమ్మెల్యే జారె ఆదినారాయణ (Jare Adinarayana) గురువారం క్షేత్రస్థాయిలో పరిశీలించారు. ఆత్మ కమిటీ చైర్మన్ సుంకవల్లి వీరభద్రరావు, మున్సిపల్ వైస్ చైర్మన్ జూపల్లి రమేష్ బాబుతో కలిసి వరద ప్రభావిత ప్రాంతాల్లో విస్తృతంగా పర్యటించారు. ఈ సందర్భంగా దెబ్బతిన్న ఇళ్లు, నీట మునిగిన పంట పొలాలు, ధ్వంసమైన రహదారులు, చెరువులను పరిశీలించి బాధితుల సమస్యలను అడిగి తెలుసుకున్నారు.
వరద నష్టంపై క్షేత్రస్థాయిలో పరిశీలన!
తుఫాన్‌ ప్రభావంతో వరద నీటికి దెబ్బతిన్న నివాస గృహాలు, నీట మునిగిన వ్యవసాయ భూములు, దెబ్బతిన్న రహదారులు, చెరువులను ఎంపీ, ఎమ్మెల్యే స్వయంగా పరిశీలించారు. వరదల కారణంగా ఎదురైన ఇబ్బందులను స్థానిక ప్రజలను అడిగి తెలుసుకున్నారు. పంటలు దెబ్బతిని తీవ్రంగా నష్టపోయిన రైతులతో మాట్లాడి వారి కష్టాలను తెలుసుకున్నారు. ప్రకృతి విపత్తుతో నష్టపోయిన ప్రతి ప్రాంతాన్ని అధికారులు క్షుణ్ణంగా పరిశీలించి వాస్తవ పరిస్థితులను ప్రభుత్వానికి తెలియజేయాలని సూచించారు.
బాధితులు అధైర్యపడొద్దు..
ఈ సందర్భంగా ఎంపీ రఘురామ్ రెడ్డి, ఎమ్మెల్యే జారె ఆదినారాయణ మాట్లాడుతూ.. ప్రకృతి విపత్తుల సమయంలో ప్రజలు అధైర్యపడవద్దని, ప్రభుత్వం అన్ని విధాలుగా అండగా ఉంటుందని భరోసా ఇచ్చారు. వరదల కారణంగా జరిగిన పంట, ఆస్తి నష్టాలను అధికారులు క్షేత్రస్థాయిలో సమగ్రంగా అంచనా వేసి నివేదికలు సిద్ధం చేయాలని ఆదేశించారు. ప్రభుత్వ నిబంధనల ప్రకారం అర్హులైన బాధితులందరికీ నష్టపరిహారం అందేలా చర్యలు తీసుకుంటామని స్పష్టం చేశారు. ముఖ్యంగా పంటలు కోల్పోయిన రైతులకు తగిన పరిహారం అందించేందుకు కృషి చేస్తామని హామీ ఇచ్చారు.
రహదారుల పునరుద్ధరణకు ఆదేశాలు..
వరదలకు దెబ్బతిన్న రహదారులకు తక్షణమే మరమ్మతులు చేపట్టి ప్రజలకు రాకపోకల్లో ఇబ్బందులు కలగకుండా చూడాలని అధికారులను ఆదేశించారు. చెరువులు, కాలువల్లో నీటి ప్రవాహానికి ఆటంకాలు లేకుండా అవసరమైన చర్యలు చేపట్టాలని సూచించారు. ప్రజలకు తాగునీరు, విద్యుత్, వైద్య సేవలు నిరంతరాయంగా అందేలా ప్రత్యేక శ్రద్ధ తీసుకోవాలని తెలిపారు. వరద ప్రభావిత ప్రాంతాల్లో పరిస్థితులు పూర్తిగా సాధారణ స్థితికి చేరుకునే వరకు అధికారులు అప్రమత్తంగా ఉండాలని, అన్ని శాఖలు సమన్వయంతో పనిచేస్తూ బాధితులకు అవసరమైన సహాయ సహకారాలు అందించాలని దిశానిర్దేశం చేశారు. ఈ పర్యటనలో ప్రజాప్రతినిధులు, కాంగ్రెస్ నాయకులు, వివిధ ప్రభుత్వ శాఖల అధికారులు తదితరులు పాల్గొన్నారు.
