కలం, ఖమ్మం బ్యూరో: ఖమ్మం జిల్లా సత్తుపల్లిలోని రాణి ఫంక్షన్ హాల్ వేదికగా శుక్రవారం జరిగిన 73వ రాష్ట్రస్థాయి మహిళల కబడ్డీ ఛాంపియన్‌షిప్ ముగింపు వేడుకలు ఒక అపురూపమైన క్రీడా పండగలా నిలిచాయి. ఖమ్మం డిస్ట్రిక్ట్ కబడ్డీ అసోసియేషన్ ఆధ్వర్యంలో అత్యంత వైభవంగా సాగిన ఈ టోర్నమెంట్‌లో రాష్ట్ర నలుమూలల నుంచి వచ్చిన మహిళా క్రీడాకారిణులు తమ సత్తా చాటారు. ఈ మహా వేడుకకు రాష్ట్ర రెవెన్యూ, గృహనిర్మాణ, సమాచార పౌరసంబంధాల శాఖల మంత్రి పొంగులేటి శ్రీనివాసరెడ్డి సతీమణి పొంగులేటి మాధురి (Ponguleti Madhuri) ముఖ్య అతిథిగా హాజరయ్యారు.
కోర్టులోకి దిగి.. క్రీడాకారిణుల్లో కొత్త జోష్ నింపి
కార్యక్రమంలో భాగంగా పొంగులేటి మాధురి కేవలం ప్రేక్షక పాత్రకు పరిమితం కాలేదు. మహిళా క్రీడాకారుల ఉత్సాహాన్ని చూసి ఆమె స్వయంగా మైదానంలోకి అడుగుపెట్టారు. కబడ్డీ కోర్టులో క్రీడాకారిణులతో కలిసి కాసేపు కాలు కదిపి, రైడ్ చేసి అందరినీ అవాక్కయ్యేలా చేశారు. ఒక మంత్రి సతీమణి తమ స్థాయిని పక్కన పెట్టి, నేరుగా మైదానంలోకి వచ్చి తమతో కలిసి కబడ్డీ ఆడటాన్ని చూసి ఆ మహిళా క్రీడాకారుల ఉత్సాహం అంబరాన్ని తాకింది. సత్తుపల్లి రాణి ఫంక్షన్ హాల్ ప్రాంగణం మొత్తం క్రీడాకారిణుల కేరింతలు, కరతాళ ధ్వనులతో మార్మోగింది. ఈ చిన్న క్షణం ఆ క్రీడాకారిణుల గుండెల్లో ఎనలేని ధైర్యాన్ని, ఆత్మస్థైర్యాన్ని నింపింది.
మహిళా సాధికారతకు, క్రీడా స్ఫూర్తికి ప్రతీక
అనంతరం జరిగిన ముగింపు వేడుకల్లో మాధురి మాట్లాడుతూ.. చదువుతో పాటు క్రీడలు కూడా మహిళల ఉజ్వల భవిష్యత్తుకు పునాది రాళ్లు అవుతాయని పేర్కొన్నారు. మన మట్టి సువాసనలున్న కబడ్డీ ఆటలో మన రాష్ట్ర ఆడబిడ్డలు జాతీయ, అంతర్జాతీయ స్థాయిలో రాణించాలని ఆకాంక్షించారు. గెలుపోటములు ముఖ్యం కాదని, ఆటలో ప్రతి ఒక్కరూ ప్రదర్శించిన పట్టుదల, క్రీడా స్ఫూర్తే అసలైన విజయమని కొనియాడారు.
ఉత్కంఠభరితంగా సాగిన ఈ ఫైనల్ మ్యాచ్‌ల ముగింపులో విజేతలకు ట్రోఫీలు అందజేసి అభినందించారు.
