కలం, పెద్దపల్లి: విధి నిర్వహణలో ప్రాణాలర్పించిన పోలీస్ అమరవీరుల త్యాగాలు చిరస్మరణీయమని పెద్దపల్లి డీసీపీ భూక్య రామ్ రెడ్డి పేర్కొన్నారు. పోలీస్ అమరవీరుల దినోత్సవాన్ని పురస్కరించుకుని బుధవారం సుల్తానాబాద్ (Sultanabad) సర్కిల్ పోలీసుల ఆధ్వర్యంలో బృహత్ సైకిల్ ర్యాలీ (Cycle Rally) ని అత్యంత ఉత్సాహపూరిత వాతావరణంలో నిర్వహించారు. సుల్తానాబాద్ సర్కిల్ పరిధిలోని సుల్తానాబాద్, జూలపల్లి, ఎలిగేడు, పొత్కపల్లి, కాల్వ శ్రీరాంపూర్ పోలీస్ స్టేషన్ల సంయుక్త ఆధ్వర్యంలో, సీఐ పొన్నమనేని రంజిత్ రావు పర్యవేక్షణలో ఈ కార్యక్రమాన్ని చేపట్టారు. స్థానిక తెలంగాణ చౌరస్తా వద్ద డీసీపీ భూక్య రామ్ రెడ్డి జెండా ఊపి సైకిల్ ర్యాలీని లాంఛనంగా ప్రారంభించారు.
అమరుల కుటుంబాలకు అండగా ఉంటాం
ఈ సందర్భంగా డీసీపీ భూక్య రామ్ రెడ్డి మాట్లాడుతూ.. “ప్రజల రక్షణ కోసం, శాంతిభద్రతల పరిరక్షణ కోసం విధులు నిర్వర్తిస్తూ పోలీసులు వివిధ సందర్భాల్లో ప్రాణాలు కోల్పోవడం ఎంతో బాధాకరం. తమ ప్రాణాలను సైతం లెక్కచేయకుండా సమాజ శ్రేయస్సు కోసం పోరాడిన అమరుల త్యాగాలు సదా స్మరణీయమైనవి. విధి నిర్వహణలో ప్రాణాలు అర్పించిన అమరవీరుల కుటుంబాలకు పోలీస్ శాఖ ఎల్లప్పుడూ అండగా ఉంటుందని భరోసా ఇస్తున్నాం” అని పేర్కొన్నారు. తెలంగాణ చౌరస్తా నుంచి ప్రారంభమైన ఈ సైకిల్ ర్యాలీ పట్టణంలోని ప్రధాన వీధుల గుండా సాగింది. ర్యాలీ పొడవునా అమరవీరులకు నివాళులర్పిస్తూ నినాదాలు చేశారు.
పెద్ద ఎత్తున పాల్గొన్న ప్రజాప్రతినిధులు, ప్రజలు
ఈ సైకిల్ ర్యాలీ కార్యక్రమంలో పోలీస్ అధికారులతో పాటు సమాజంలోని వివిధ రంగాల ప్రజలు విశేషంగా పాల్గొన్నారు. ఎస్సైలు చంద్రకుమార్, మధుకర్, గట్ల సుధాకర్‌లతో పాటు సుల్తానాబాద్ సర్కిల్ పరిధిలోని పోలీసు సిబ్బంది, వాకర్స్ అసోసియేషన్ సభ్యులు, సుల్తానాబాద్ మండల పాత్రికేయులు, క్రీడాకారులు, పెద్ద సంఖ్యలో విద్యార్థులు పాల్గొని కార్యక్రమాన్ని జయప్రదం చేశారు.
