కలం, చింతకాని: “మొక్క నాటడమే కాదు.. దాన్ని మహావృక్షంగా పెంచడమూ మా బాధ్యతే” అంటూ చింతకాని మండలం తిరుమలాపురం (Thirumalapuram) గ్రామ పంచాయతీ పర్యావరణ ప్రేమికులకు ఆదర్శంగా నిలుస్తోంది. గ్రామంలో నూతనంగా నిర్మించిన నాగులవంచ రోడ్డు ఇరువైపులా ఉపాధి హామీ పథకం కింద నాటిన 80 మొక్కల సంరక్షణకు పంచాయతీ యంత్రాంగం నడుం బిగించింది. మొక్కలు ఏపుగా పెరిగేందుకు వీలుగా వాటి చుట్టూ పాదులు ఏర్పాటు చేయడమే కాకుండా, మేకలు, గొర్రెలు, ఇతర పశువుల బారిన పడి నశించిపోకుండా పటిష్టమైన ముళ్లకంచెలను రక్షణగా అమర్చారు. కేవలం నాటడమే కాకుండా, వాటికి రక్షణ కల్పించి పచ్చదనాన్ని కాపాడాలనే సంకల్పంతో తీసుకుంటున్న ఈ చర్యలు స్థానికుల ప్రశంసలు అందుకుంటున్నాయి.
గ్రామ సర్పంచ్ వీరబాబు అధ్యక్షతన జరిగిన ఈ సంరక్షణ కార్యక్రమాన్ని చింతకాని టెక్నికల్ అసిస్టెంట్ ఎక్కిరాల కృష్ణయ్య నేరుగా పరిశీలించారు. మొక్కల చుట్టూ పాదుల నిర్వహణ, ముళ్లకంచెల పటిష్టతపై ఆరా తీశారు. మొక్కలు నిరాటంకంగా పెరిగేందుకు తీసుకోవాల్సిన జాగ్రత్తలపై మేట్ మడిపల్లి రామకృష్ణకు పలు కీలక సూచనలు చేశారు. ఈ సందర్భంగా సర్పంచ్ వీరబాబు మాట్లాడుతూ.. గ్రామంలో చేపడుతున్న ఉపాధి హామీ పనుల్లో పర్యావరణ పరిరక్షణకే ప్రథమ ప్రాధాన్యం ఇస్తున్నామని, నాటిన ప్రతి మొక్కనూ కాపాడుకుని ఊరిని పచ్చదనంతో నింపుతామని స్పష్టం చేశారు.
