క‌లం, స్పోర్ట్స్: భారత గోల్ఫర్ ప్రణవి ఉర్స్ (Pranavi Urse) ఆసియా గేమ్స్‌లో సరికొత్త చరిత్ర సృష్టించారు. మహిళల వ్యక్తిగత స్ట్రోక్ ప్లే విభాగంలో స్వర్ణ పతకం సాధించి భారత్‌కు మొదటి గోల్డ్ మెడల్ అందించారు. ఈ చారిత్రక విజయంతో పాటు అదితి అశోక్, దీక్షా దాగర్‌లతో కూడిన భారత జట్టు రజత పతకాన్ని కూడా కైవసం చేసుకుంది. ఐచి-నాగోయా వేదికగా జరిగిన ఈ పోటీల్లో ప్రణవి అర్స్ డబుల్ మెడల్స్ గెలుచుకుని భారత క్రీడా చరిత్రలో నిలిచారు.
ఫైనల్ రౌండ్ పోటీలు ఎంతో ఉత్కంఠగా సాగాయి. మూడో హోల్‌లో నిరాశపరిచినప్పటికీ, ప్రణవి పుంజుకుని వరుసగా మూడు బర్డీలు సాధించారు. చివరి రౌండ్‌ను ఈవెన్ ప్యాట్ 70తో ముగించిన ప్రణవి, మొత్తం 15 అండర్ 265 స్కోరుతో అగ్రస్థానంలో నిలిచారు. చైనాకు చెందిన యిన్ రుయోనింగ్ రజతం, సింగపూర్ గోల్ఫర్ షానన్ తన్ కాంస్యం సాధించారు.
ప్రణవి ఉర్స్ (Pranavi Urse) అత్యుత్తమ ప్రదర్శనతో భారత జట్టు 14 అండర్ 546 స్కోరు సాధించి రెండో స్థానంలో నిలిచింది. అదితి అశోక్ 67 స్కోరుతో మెరవగా, దీక్షా దాగర్ 77 స్కోరు నమోదు చేశారు. గత పోటీల్లో అదితి అశోక్ గెలిచిన రజతమే ఇప్పటివరకు మహిళల విభాగంలో అత్యుత్తమ ప్రదర్శన కాగా, ఇప్పుడు భారత జట్టు తమ రికార్డును మరింత మెరుగుపరుచుకుంది.
ఆసియా గేమ్స్ గోల్ఫ్‌లో 2002లో శివ్ కపూర్ పురుషుల విభాగంలో స్వర్ణం గెలిచాక భారత్‌కు మళ్లీ ఇదే తొలి పసిడి పతకం. 1982 ఢిల్లీ ఆసియా గేమ్స్ తర్వాత భారత గోల్ఫ్ చరిత్రలోనే ఇది అత్యుత్తమ ప్రదర్శనగా నిలిచింది. ఈ చారిత్రక విజయం భారత మహిళల గోల్ఫ్ రంగానికి సరికొత్త గుర్తింపును, దిశను అందించింది.
Also Read : ఫ్రీస్టైల్ రెజ్లింగ్‌లో అమాన్ అద్భుత విజయం..!
Follow Us On: X(Twitter)
