కలం, స్పోర్ట్స్ : యూఎఫ్సీ వేగాస్ 121 (UFC Vegas 121) ఈవెంట్లో అర్జెంటీనా మహిళా ఫైటర్ ఐలిన్ పెరెజ్ అద్భుత విజయం సాధించారు. కో-మెయిన్ ఈవెంట్లో బ్రెజిల్కు చెందిన నోర్మా డుమోంట్తో జరిగిన హోరాహోరీ పోరులో పెరెజ్ ఏకగ్రీవ నిర్ణయంతో గెలుపొందారు. ఈ విజయంతో యూఎఫ్సీలో ఆమె వరుసగా ఏడో విజయాన్ని తన ఖాతాలో వేసుకున్నారు. అయితే ఈ మ్యాచ్ ఫలితం తీవ్ర వివాదానికి దారితీసింది.
ఈ పోరుకు ముందు నుంచి ఇద్దరి మధ్య తీవ్ర ఉద్రిక్తతలు నెలకొన్నాయి. ఫేస్ ఆఫ్ సమయంలో డుమోంట్ వింతగా ప్రవర్తిస్తూ పెరెజ్పైకి కాండమ్స్, నగదు విసిరేశారు. దీనికి బదులుగా మ్యాచ్ ముగిసిన తర్వాత సోషల్ మీడియాలో పెరెజ్ ఘాటుగా స్పందించారు. తనకు అవి అవసరం లేదంటూ సెటైర్లు వేశారు. ఈ గొడవ మ్యాచ్ (UFC Vegas 121) ముగిశాక కూడా తగ్గలేదు. న్యాయ నిర్ణేతలు ముగ్గురూ 29-28 తేడాతో పెరెజ్కు అనుకూలంగా తీర్పు ఇవ్వడాన్ని డుమోంట్ ఏమాత్రం జీర్ణించుకోలేకపోయారు.
తీర్పు ప్రకటించగానే డుమోంట్ తీవ్ర అసంతృప్తి వ్యక్తం చేశారు. ఇది తన కెరీర్లోనే అతిపెద్ద అన్యాయమని, ఈ ఓటమిని తాను అంగీకరించబోనని స్పష్టం చేశారు. మ్యాచ్ తర్వాత కూడా ఇద్దరి మధ్య తీవ్ర వాగ్వాదం జరగడంతో సెక్యూరిటీ సిబ్బంది రెండుసార్లు జోక్యం చేసుకోవాల్సి వచ్చింది. కాగా, ఈ విజయంపై స్పందించిన పెరెజ్, తాను త్వరలోనే యూఎఫ్సీ ఛాంపియన్గా నిలుస్తానని ఆత్మవిశ్వాసం వ్యక్తం చేశారు. డుమోంట్ వంటి బలమైన ప్రత్యర్థులను ఓడించడం వల్ల తానొక మెరుగైన ఫైటర్గా ఎదుగుతున్నానని తెలిపారు.
