స్కీట్‌లో మరో పతకం.. నరూకా-పరినాజ్ సత్తా!

కలం, స్పోర్ట్స్​ : ఆసియా క్రీడల్లో (Asian Games) భారత షూటర్ల జోరు కొనసాగుతోంది. మిక్స్‌డ్ స్కీట్ టీమ్ ఈవెంట్‌లో అనంత్ జీత్ సింగ్ నరూకా (Anant Jeet Singh Naruka), పరినాజ్ ధాలివాల్ కాంస్య పతకం గెలిచారు. గురువారం జరిగిన ఫైనల్లో భారత జోడీ 44 హిట్స్‌తో మూడో స్థానంలో నిలిచింది. దీంతో ఆర్చీ-నాగోయా ఆసియా క్రీడల్లో భారత్‌కు స్కీట్‌లో మరో పతకం చేరింది. ఫైనల్లో భారత్, దక్షిణ కొరియా మధ్య తీవ్ర పోటీ కనిపించింది. ఆరు సిరీస్‌ల తర్వాత ఇరు జట్ల స్కోరు 44 వద్ద సమంగా నిలిచింది.

దీంతో క్వాలిఫికేషన్ ర్యాంకింగ్ కీలకంగా మారింది. క్వాలిఫికేషన్‌లో మెరుగైన స్థానంలో ఉన్న దక్షిణ కొరియా ముందుకు వెళ్లింది. భారత్ మూడో స్థానంతో కాంస్యాన్ని దక్కించుకుంది. భారత్ ఆరు సిరీస్‌ల్లో వరుసగా 7, 14, 21, 29, 36, 44 హిట్స్ నమోదు చేసింది. చైనా 52 హిట్స్‌తో స్వర్ణం గెలిచింది. దక్షిణ కొరియా 51 హిట్స్‌తో రజతం సాధించింది. ఖతార్ 18 హిట్స్‌తో నాలుగో స్థానంలో నిలిచింది. అంతకుముందు క్వాలిఫికేషన్‌లో నరూకా-పరినాజ్ జోడీ 150 టార్గెట్లలో 138 పాయింట్లు సాధించింది.

నాలుగో స్థానంలో నిలిచి ఫైనల్‌కు అర్హత సాధించింది. క్వాలిఫికేషన్‌లో ఖతార్ 145, దక్షిణ కొరియా 143, చైనా 140 పాయింట్లతో తొలి మూడు స్థానాల్లో ఉన్నాయి. ఈ కాంస్యంతో నరూకా, పరినాజ్ ఇద్దరూ ఈ ఆసియా క్రీడల్లో రెండో పతకాన్ని అందుకున్నారు. నరూకా ఇప్పటికే పురుషుల స్కీట్ టీమ్ ఈవెంట్‌లో మైరాజ్ అహ్మద్ ఖాన్, భవ్‌తేగ్ సింగ్ గిల్‌తో కలిసి కాంస్యం సాధించారు. వ్యక్తిగత విభాగంలో మాత్రం నాలుగో స్థానంలో నిలిచారు.

పరినాజ్ కూడా మహిళల స్కీట్ టీమ్ ఈవెంట్‌లో రైజా ధిల్లాన్, మహేశ్వరి చౌహాన్‌తో కలిసి కాంస్యం గెలిచారు. ఆ పతకం మహిళల స్కీట్ టీమ్ ఈవెంట్‌లో భారత్‌కు తొలి ఆసియా క్రీడల (Asian Games) పతకంగా నిలిచింది. మిక్స్‌డ్ టీమ్ కాంస్యంతో ఆర్చీ-నాగోయా ఆసియా క్రీడల్లో భారత స్కీట్ పతకాల సంఖ్య మూడుకు చేరింది. పురుషుల, మహిళల టీమ్ ఈవెంట్ల తర్వాత ఇప్పుడు మిక్స్‌డ్ టీమ్‌లోనూ భారత్ పతకం సాధించింది.

Also Read : పార్ట్‌నర్ ఫోన్ చెక్ చేయొచ్చా?.. నిపుణులు ఏం అంటున్నారంటే!

Follow Us On: X(Twitter)