కలం, వెబ్ డెస్క్ : రష్యాపై కఠిన ఆంక్షలు విధించేందుకు ఉద్దేశించిన కీలక బిల్లు(Russia Sanctions Bill)కు అమెరికా ప్రతినిధుల సభ (హౌస్ ఆఫ్ రిప్రజెంటేటివ్స్) గ్రీన్ సిగ్నల్ ఇచ్చింది. ప్రతినిధుల సభలో జరిగిన ఓటింగ్లో 262-159 ఓట్లతో ఈ బిల్లు ఆమోదం పొందింది. ఈ బిల్లుకు ఇదివరకే సెనేట్లో 86-11 ఓట్ల భారీ మెజారిటీతో ఆమోదం లభించింది. రెండు సభల ప్రక్రియ పూర్తవడంతో, అమెరికా అధ్యక్షుడు డోనాల్డ్ ట్రంప్ సంతకం చేసిన తర్వాత ఇది పూర్తిస్థాయి చట్టంగా రూపుదిద్దుకోనుంది.
ఈ నూతన చట్టం ద్వారా రష్యా ఇంధన, రక్షణ రంగాలు, ఆర్థిక వ్యవస్థను మరింత బలహీనపరిచేలా అదనపు ఆంక్షలు అమలులోకి రానున్నాయి. దీనితో పాటు ఇరాన్పై కూడా అదనపు ఆంక్షలు విధించేలా ప్రత్యేక నిబంధనలను ఈ బిల్లులో చేర్చారు. ముఖ్యంగా, రష్యా నుంచి చమురు, సహజ వాయువును కొనుగోలు చేసే దేశాలపై 100 శాతం వరకు దిగుమతి సుంకాలు (టారిఫ్లు) విధించేందుకు అమెరికా అధ్యక్షుడికి పూర్తి అధికారాలను ఈ బిల్లు (Russia Sanctions Bill) కల్పిస్తోంది.
ప్రస్తుతం రష్యా నుంచి అత్యధికంగా ముడి చమురును దిగుమతి చేసుకుంటున్న దేశాల్లో భారతదేశం కూడా ఒకటిగా ఉంది. అమెరికా అధ్యక్షుడికి లభించనున్న ఈ 100 శాతం టారిఫ్ అధికారాల కారణంగా, భారత్కు వాణిజ్య, ఇంధన రంగాల్లో తీవ్రమైన కొత్త అనిశ్చితి వాతావరణం ఏర్పడే అవకాశం ఉంది.
Also Read : ల్యాండ్ గ్రాబింగ్ చట్టం రద్దు వెనుక పెద్ద కుట్ర?
Follow Us On : WhatsApp
