కలం, వెబ్ డెస్క్ : అసెంబ్లీ వేదికగా ముఖ్యమంత్రి రేవంత్ రెడ్డి (CM Revanth Reddy) సంచలన నిర్ణయం తీసుకున్నారు. మాజీ సీఎం, బీఆర్ఎస్ అధినేత కేసీఆర్ ఫామ్ హౌజ్ పై విచారణకు ఆదేశించారు. ఫామ్ హౌజ్ భూములపై ఎంక్వైరీ చేయాలని అధికారులకు ఆదేశాలు జారీ చేశారు. విచారణ జరపకపోతే అధికారులపై కఠిన చర్యలు తీసుకుంటామని సీఎం రేవంత్ రెడ్డి హెచ్చరించారు.
అలాగే, ఫామ్ హౌజ్ భూముల(KCR Farmhouse Lands)పై 30 రోజుల్లో నివేదిక అందజేయాలని ఆయన స్పష్టం చేశారు. తెలంగాణ ఉద్యమకారుడిగా చెప్పుకునే కేసీఆర్ వేల కోట్ల రూపాయలు, వందలాది ఎకరాలు ఎలా సంపాదించారని సీఎం రేవంత్ ప్రశ్నించారు. కానీ, ఉద్యమకారులు సర్వం కోల్పోయారని ఆవేదన వ్యక్తం చేశారు. ధరణి ద్వారా కేసీఆర్ కుటుంబం వందల ఎకరాలు దోచుకుందని ధ్వజమెత్తారు.
కల్వకుంట్ల కుటుంబానికి 9 జిల్లాల్లో 440 ఎకరాల భూమి ఉందని అసెంబ్లీ సాక్షిగా ప్రకటించారు. కేసీఆర్ కుటుంబానికి ఏయే జిల్లాల్లో ఉన్న భూముల వివరాలను అసెంబ్లీ వేదికగా సీఎం రేవంత్ చదివి వినిపించారు. ఫామ్ హౌజ్ పేరుతో ప్రభుత్వ భూమిని కబ్జా చేశారని.. ఆ భూములను పేద ప్రజలకు పంచుతానని ముఖ్యమంత్రి ప్రకటించారు.
సీఎం రేవంత్ అసెంబ్లీ వేదికగా వెల్లడించిన భూ వివరాలు
మాజీ సీఎం కేసీఆర్ కుటుంబానికి వందలాది ఎకరాలకు సంబంధించిన 439.30 ఎకరాల భూ వివరాలను సీఎం రేవంత్ రెడ్డి అసెంబ్లీ వేదికగా ప్రకటించారు. కేసీఆర్ కుటుంబానికి సంబంధించి 67.13 ఎకరాలు ఉన్నాయని రేవంత్ రెడ్డి వెల్లడించారు. సిద్దిపేట జిల్లా, ఎర్రవల్లి, మిట్టపల్లి, శివార్ వెంకటాపూర్ లో కేసీఆర్, ఆయన భార్య పేరుపై 67.13 ఎకరాలు ఉందన్నారు.
కేటీఆర్ ఆయన భార్య శైలిమ, కుమార్తె అలేఖ్య, కుమారుడు హిమాన్షు రావు పేర్లపై సిద్దిపేట, రంగారెడ్డి జిల్లాలు; ఎర్రవల్లి, జన్వాడ, మర్కూక్, శివార్ వెంకటాపూర్లో 123. 19 ఎకరాలు ఉన్నట్లు సీఎం వివరించారు. అలాగే, టీఆర్ఎస్ చీఫ్ కవిత, ఆమె భర్త పేరుపై మహబూబ్ నగర్, రంగారెడ్డి, జగిత్యాల, నిజామాబాద్, రాజన్న సిరిసిల్ల జిల్లాల్లో 37.26 ఎకరాలు ఉన్నాయన్నారు. హరీశ్ రావు, ఆయన భార్య పేరుపై రంగారెడ్డి, సిద్ధిపేట జిల్లాల్లో 30.16 ఎకరాలు ఉన్నట్లు సీఎం వెల్లడించారు.
జోగినిపల్లి కుటుంబంలో రవీందర్ రావు, సంతోష్ కుమార్, సంతోష్ కుమార్ భార్య రోహిణి పేర్లపై 79.20 ఎకరాలు ఉన్నట్లు వెల్లడించారు. నవీన్ కుమార్, కొండల్ రావు కుటుంబానికి మేడ్చల్-మల్కాజిగిరి, రంగారెడ్డి, సంగారెడ్డి, సిద్ధిపేట జిల్లాల్లో 101. 14 ఎకరాలు ఉన్నట్లు సీఎం రేవంత్ రెడ్డి అసెంబ్లీ వేదికగా వివరాలు ప్రకటించారు.
Also Read : వైభవ్‌తో పోటీపై సంజూ షాకింగ్ కామెంట్స్!
Follow Us On: X(Twitter)
