కలం, స్పోర్ట్స్ : ఇంగ్లండ్ చేతిలో వరుస ఓటములతో పాకిస్థాన్ క్రికెట్ బోర్డు (PCB) కీలక నిర్ణయం దిశగా అడుగులు వేస్తోంది. టెస్ట్ జట్టులోకి వైట్ బాల్ కోచ్ మైక్ హేసన్ను తీసుకురావాలని భావిస్తోంది. ఇంగ్లండ్తో మూడో టెస్ట్ సెప్టెంబర్ 9న బర్మింగ్హామ్లోని ఎడ్జ్బాస్టన్లో మొదలవుతుంది. ఈ మ్యాచ్ నుంచే హేసన్ టెస్ట్ జట్టుతో కలిసే అవకాశాలు ఉన్నాయి. ప్రస్తుతం పాకిస్థాన్ టెస్ట్ హెడ్ కోచ్గా సరఫరాజ్ అహ్మద్ ఉన్నారు. అయితే ఆయన భవిష్యత్పై ఇప్పుడు ప్రశ్నలు మొదలయ్యాయి.
ఇంగ్లండ్తో తొలి టెస్టులో పాకిస్థాన్ ఇన్నింగ్స్ 103 పరుగుల తేడాతో ఓడింది. రెండో టెస్టులో 194 పరుగుల తేడాతో పరాజయం పాలైంది. ఆ మ్యాచ్ తొలి ఇన్నింగ్స్లో పాకిస్థాన్ కేవలం 110 పరుగులకే ఆలౌటైంది. ఈ వరుస ఓటములతో కోచింగ్ వ్యవస్థపై పీసీబీలో చర్చలు మొదలయ్యాయి. ఇందులో భాగంగానే హేసన్ను టెస్ట్ జట్టుతో కలపాలని నిర్ణయించినట్లు సమాచారం. ఎడ్జ్బాస్టన్ టెస్టులో హేసన్ డ్రెస్సింగ్ రూమ్లో ఉండే అవకాశం ఉంది. అయితే ఆయన పాత్ర అధికారికమా, తాత్కాలికమా, లేక సలహాదారు స్థాయిలో ఉంటుందా అన్నది పీసీబీ స్పష్టం చేయలేదు.
హేసన్ ప్రస్తుతం పాకిస్థాన్ వన్డే, టీ20 జట్లకు కోచ్గా ఉన్నారు. టెస్ట్ బాధ్యతలు కూడా వస్తే ఆయన పాత్ర మూడు ఫార్మాట్లకు విస్తరించే అవకాశం ఉంటుంది. ఇంగ్లండ్ పర్యటన ముగిసిన తర్వాత సరఫరాజ్ను టెస్ట్ కోచ్ పదవి నుంచి తప్పించే అవకాశం ఉందన్న సమాచారం కూడా ఉంది. అయితే దీనిపై పీసీబీ నుంచి ఇప్పటివరకు అధికారిక ప్రకటన రాలేదు. ఎడ్జ్బాస్టన్ టెస్టుతో పాకిస్థాన్ టెస్ట్ కోచింగ్ వ్యవస్థలో మార్పులు ఏ దిశగా వెళ్తాయో స్పష్టత వచ్చే అవకాశం ఉంది.
