కలం, వెబ్ డెస్క్: రాబోయే ఆసియా గేమ్స్లో భారత పురుషుల టేబుల్ టెన్నిస్ జట్టు పతకం సాధిస్తుందని అర్జున అవార్డు గ్రహీత, స్టార్ ప్లేయర్ హర్మీత్ దేశాయ్ (Harmeet Desai) ధీమా వ్యక్తం చేశారు. జట్టులో అనుభవజ్ఞులతో పాటు యువ ఆటగాళ్లు ఉన్నారని, బలమైన పోటీని ఇచ్చేందుకు సిద్ధంగా ఉన్నామని తెలిపారు. భారత పురుషుల జట్టులో తనతో పాటు మానవ్ ఠక్కర్, మనుష్ షా, జి. సతియన్, పయాస్ జైన్ ఉన్నారని హర్మీత్ చెప్పారు. ఈ జట్టు చాలా బలంగా, సమతుల్యంగా ఉందన్నారు. మునుపటి టోర్నీల్లో ఇప్పటికే అనేక అగ్రశ్రేణి జట్లను ఓడించిన అనుభవం తమకు ఉందని గుర్తుచేశారు.
అందరం కలిసికట్టుగా రాణిస్తే ఈసారి కూడా ఖచ్చితంగా పతకం సాధించవచ్చని ఆశాభావం వ్యక్తం చేశారు. ఇటీవలి కాలంలో జపాన్, చైనా, కొరియా వంటి బలమైన ఆసియా జట్లతో భారత ఆటగాళ్లు తరచూ మ్యాచ్లు ఆడుతున్నారని హర్మీత్ తెలిపారు. ఈ అంతర్జాతీయ ఎక్స్పోజర్ వల్ల ప్రత్యర్థుల ఆటతీరుపై పూర్తి అవగాహన వచ్చిందన్నారు. తాను కూడా జర్మనీలో చైనా కోచ్ ఫు యోంగ్ వద్ద శిక్షణ పొందుతున్నట్లు చెప్పారు.
దీనివల్ల అగ్రశ్రేణి ఆటగాళ్ల టెక్నిక్లకు తగ్గట్లు తన ఆటను మెరుగుపరుచుకున్నానని వెల్లడించారు. దేశంలో టేబుల్ టెన్నిస్ రూపురేఖలు బాగా మారాయని హర్మీత్ చెప్పారు. ఆటగాళ్లకు ఇప్పుడు సొంత కోచ్లు, ఫిజియోలు, డైటీషియన్లు అందుబాటులో ఉంటున్నారని వివరించారు. ఐదేళ్ల క్రితం వరకు ఇలాంటి వసతులు లేవన్నారు. ప్రభుత్వం నుంచి లభిస్తున్న ఆర్థిక సాయం, కార్పొరేట్ స్పాన్సర్షిప్లు, క్రమం తప్పకుండా జరుగుతున్న లీగ్స్ వల్ల ఆటగాళ్ల నైపుణ్యం మరింత పెరిగిందని తెలిపారు.
ఒకప్పుడు ఆసియా దేశాల నుంచి తీవ్ర పోటీని ఎదుర్కొన్న భారత టేబుల్ టెన్నిస్, 2018 ఆసియా గేమ్స్లో చారిత్రాత్మక కాంస్య పతకం గెలిచి కొత్త అధ్యాయం ప్రారంభించింది. ఆ తర్వాత 2022లో మహిళల డబుల్స్ విభాగంలోనూ పతకం లభించింది. ఈ సానుకూల పరిణామాలు, మౌలిక వసతులు భారత ప్యాడ్లర్లను రాబోయే ఆసియా గేమ్స్కు మరింత బలంగా సిద్ధం చేస్తున్నాయి.
