కలం, స్పోర్ట్స్ : పాకిస్థాన్ జావెలిన్ స్టార్ అర్షద్ నదీమ్ (Arshad Nadeem) కీలక నిర్ణయం తీసుకున్నాడు. ఈ నెల లాసాన్ డైమండ్ లీగ్లో పోటీ చేయకూడదని నిర్ణయించాడు. ఆసియా గేమ్స్కు సిద్ధం కావడంపైనే దృష్టి పెట్టాడు. నదీమ్ ప్రస్తుతం లాహోర్లో శిక్షణ తీసుకుంటున్నాడు. దక్షిణాఫ్రికా వెళ్లేందుకు వీసా కోసం ఎదురుచూస్తున్నాడు. వీసా వచ్చిన తర్వాత అక్కడికి వెళ్లనున్నాడు. దక్షిణాఫ్రికాలోని పోట్చెఫ్స్ట్రూమ్లో సుమారు రెండు వారాలు శిక్షణ తీసుకోనున్నాడు. తన కోచ్ టెర్సియస్ లీబెన్బర్గ్తో పాటు స్థానిక శిక్షకుల ఆధ్వర్యంలో సాధన చేయనున్నాడు.
ఆగస్టు 21న లాసాన్లో డైమండ్ లీగ్ జరగనుంది. ఈ పోటీలో భారత్కు చెందిన నీరజ్ చోప్రా, జర్మనీకి చెందిన జూలియన్ వెబర్, గ్రెనడాకు చెందిన అండర్సన్ పీటర్స్ పాల్గొననున్నారు. అయితే నదీమ్ ఈ పోటీకి దూరంగా ఉండాలని నిర్ణయించాడు. దక్షిణాఫ్రికా శిక్షణ శిబిరం తన తదుపరి పోటీలకు మెరుగ్గా సిద్ధం కావడానికి ఉపయోగపడుతుందని భావిస్తున్నాడు. పోట్చెఫ్స్ట్రూమ్ నదీమ్కు పరిచయమైన శిక్షణ కేంద్రం. 2022 కామన్వెల్త్ గేమ్స్, 2024 ఒలింపిక్స్కు ముందు కూడా అక్కడే శిక్షణ తీసుకున్నాడు. ఆ రెండు పోటీల్లోనూ స్వర్ణ పతకాలు సాధించాడు.
అయితే ఈ ఏడాది నదీమ్కు ఆశించిన ఫలితాలు రాలేదు. ఇటీవల గ్లాస్గో కామన్వెల్త్ గేమ్స్ ఫైనల్లో టాప్-8లో చోటు దక్కించుకోలేకపోయాడు. ఆ ఫైనల్లో శ్రీలంకకు చెందిన రుమేష్ తరంగ పతిరాజే 89.75 మీటర్ల త్రోతో స్వర్ణం గెలిచాడు. నీరజ్ చోప్రా రెండో స్థానంలో నిలిచాడు. యశ్ వీర్ సింగ్ మూడో స్థానంలో నిలిచాడు. దక్షిణాఫ్రికా శిక్షణ తర్వాత నదీమ్ సెప్టెంబర్ 6 నుంచి 14 వరకు బుడాపెస్ట్లో జరిగే వరల్డ్ అథ్లెటిక్స్ అల్టిమేట్ ఛాంపియన్షిప్స్లో పాల్గొనే అవకాశం ఉంది. ఆ తర్వాత అతడి దృష్టి ఆసియా గేమ్స్పై ఉండనుంది. ప్రస్తుతం నదీమ్ తన శిక్షణను మరింత బలోపేతం చేసుకోవడంపైనే దృష్టి పెట్టాడు.
