కలం, స్పోర్ట్స్: టీమిండియా స్టార్ పేసర్ జస్ప్రీత్ బుమ్రా ఆట నుంచి బ్రేక్ తీసుకోవడమే మంచిదని మాజీ క్రికెటర్ కర్సన్ ఘావ్రీ (Karsan Ghavri) అన్నారు. వంద శాతం ఫిట్నెస్ సాధించడమే ఇప్పుడు ఆయనకు అత్యంత ముఖ్యం. 31 ఏళ్ల బుమ్రా మోకాలి గాయంతో బాధపడుతున్నారు. ఆగస్టు 15 నుంచి గాల్లో ప్రారంభమయ్యే శ్రీలంక టెస్టు సిరీస్కు ఆయన దూరమయ్యారు. జూలైలో ఇంగ్లాండ్తో జరిగిన వన్డేలో ఫీల్డింగ్ చేస్తూ ఆయనకు గాయమైంది. వేగంగా కోలుకోవడానికి వైద్యులు ఇంజెక్షన్ కూడా ఇచ్చారు. ప్రస్తుతం ఆయన బెంగళూరులోని బీసీసీఐ సెంటర్ ఆఫ్ ఎక్సలెన్స్లో చికిత్స పొందుతున్నారు. ఈ సిరీస్లో బుమ్రా స్థానంలో ఆకిబ్ నబీని ఎంపిక చేశారు. ఈ పరిస్థితులపై ఘావ్రీ మాట్లాడారు. బుమ్రా ఐదు నుంచి ఆరు నెలలు లేదా ఏడాది పాటు విశ్రాంతి తీసుకోవాలని సూచించారు.
సగం ఫిట్నెస్తో ఆడి మధ్యలోనే తప్పుకోవడం సరికాదన్నారు. ఇది జట్టుకు మంచిది కాదని చెప్పారు. ఐపీఎల్ ఆడుతున్న షమీ, భువనేశ్వర్లను తిరిగి జట్టులోకి తీసుకోవాలని ఆయన కోరారు. మరో మాజీ పేసర్ రాజు కులకర్ణి కూడా స్పందించారు. బుమ్రా అన్ని ఫార్మాట్లలో ఆడలేరని అన్నారు. ఆయనను కేవలం టెస్టులకే పరిమితం చేయాలని సూచించారు. టీ20ల్లో భువనేశ్వర్ను, టెస్టుల్లో షమీ, సిరాజ్లను మార్చి ఆడించాలని చెప్పారు. దీనివల్ల బుమ్రాపై ఒత్తిడి తగ్గుతుందని తెలిపారు.
