కలం, వెబ్ డెస్క్ : పశ్చిమ బెంగాల్లోని ముర్షిదాబాద్ జిల్లాలో శుక్రవారం ఉదయం ఒక ఘోర రైలు ప్రమాదం (Murshidabad) సంభవించింది. బెర్హంపూర్ పోలీస్ స్టేషన్ పరిధిలోని కర్ణసుబర్ణ, గోబిందాపూర్ రైల్వే స్టేషన్ల మధ్య ఉన్న ఒక లెవెల్ క్రాసింగ్ వద్ద ఈ విషాదం చోటుచేసుకుంది. తెరిచి ఉన్న లెవెల్ క్రాసింగ్ గుండా రైల్వే ట్రాక్లను దాటుతున్న స్కూల్ వ్యాన్ను ఎదురుగా వస్తున్న ఒక ప్యాసింజర్ రైలు ఢీకొట్టింది.
ఈ ప్రమాదం ధాటికి స్కూల్ వాహనం తీవ్రంగా దెబ్బతినగా, అందులో ప్రయాణిస్తున్న ముగ్గురు పాఠశాల విద్యార్థులు అక్కడికక్కడే ప్రాణాలు కోల్పోయారు. కాగా, ఈ ఘటనలో మరో ఐదుగురు విద్యార్థులు తీవ్రంగా గాయపడ్డారు. ప్రమాదం జరిగిన వెంటనే స్థానికులు, పోలీసులు స్పందించి సహాయక చర్యలు చేపట్టారు. గాయపడిన విద్యార్థులను అత్యవసర చికిత్స నిమిత్తం ముర్షిదాబాద్ మెడికల్ కాలేజ్ అండ్ హాస్పిటల్కు తరలించారు. ప్రస్తుతం అక్కడ వారికి వైద్యులు చికిత్స అందిస్తున్నారు. ఈ ఘటనపై స్థానిక పోలీసులు కేసు నమోదు చేసుకుని దర్యాప్తు జరుపుతున్నారు.
