కలం, వెబ్ డెస్క్: బదిలీపై సీపీ వీసీ.సజ్జనార్ (VC Sajjanar) స్పందించారు. హైదరాబాద్ సీపీగా సేవలందించిన ఆయన ఫైర్, డిజాస్టర్ సర్వీసెస్ డీజీగా ట్రాన్స్ ఫర్ కావడంపై బావోద్వేగ పోస్ట్ పెట్టారు. గడిచిన ఏడాది కాలం తన జీవితంలో ఎప్పటికీ మర్చిపోలేని అపురూపమైన ప్రయాణం అని పేర్కొన్నారు. హైదరాబాద్ సీపీగా సేవ చేసే అవకాశాన్ని కల్పించిన సీఎం రేవంత్ రెడ్డికి ధన్యవాదాలు తెలిపారు. అలాగే, హైదరాబాద్ నూతన సీపీగా బాధ్యతలు స్వీకరించబోతున్న మహేష్ భగవత్ కు సజ్జనార్ అభినందనలు తెలియజేశారు.
ఏడాది కాలంలో హైదరాబాద్ ప్రజలు తన తో పాటు పోలీస్ వ్యవస్థపై చూపిన ప్రేమాభిమానాలు వెలకట్టలేనివని సజ్జనార్ (VC Sajjanar) ధన్యవాదాలు తెలిపారు. మత సామరస్యానికి ప్రతీక అయిన హైదరాబాద్ లో ప్రజలంతా కలిసిమెలిసి పండగలను ఘనంగా జరుపుకోవడం తన మనసును ఎంతగానో కదిలించిందని ఆయన పేర్కొన్నారు. ప్రజల క్షేమమే పరమావధిగా పని చేశామన్నా సజ్జనార్.. ప్రజల ప్రాణాలతో చెలగాటమాడే ఆహార కల్తీపై ‘హెచ్-ఫాస్ట్’ ద్వారా ఉక్కుపాదం మోపినట్లు చెప్పారు.
సైబర్ నేరాల కట్టడి కేవలం పోలీసుల వల్లే కాదని గుర్తించి.. ప్రజల్లో చైతన్య తీసుకువస్తూనే బ్యాంకులు, DoT వంటి విభాగాలను సమన్వయం చేస్తూ దేశవ్యాప్తంగా ‘ఆపరేషన్ ఆక్టోపస్’కు శ్రీకారం చుట్టామన్నారు సజ్జనార్. బాధితులకు సత్వర న్యాయం చేకూరేలా కేసుల దర్యాప్తు కోసం ‘ఇన్వెస్టిగేషన్ మానిటరింగ్ సెల్’ ను ప్రారంభించి విజయవంతంగా ముందుకు తీసుకెళ్లామని గుర్తు చేశారు. ప్రభుత్వ పాఠశాలల విద్యార్థులతో చేపట్టిన ‘డే విత్ సీపీ’ కార్యక్రమం తనకు ఎంతో ఆత్మసంతృప్తిని మిగిల్చిందని ఆయన రాసుకొచ్చారు.
కాగా, తెలంగాణ ప్రభుత్వం గురువారం 21 మంది సీనియర్ ఐపీఎస్ అధికారులను బదిలీ చేసింది. హైదరాబాద్ సీపీ సజ్జనార్ స్థానంలో మహేశ్ భగవత్ ను నియమించింది. సజ్జనార్ ను ఫైర్, డిజాస్టర్ సర్వీసెస్ డీజీగా ట్రాన్స్ ఫర్ అయ్యారు.
