కలం, వెబ్ డెస్క్ : సభాధిపతి స్థానంలో ఉన్న స్పీకర్ పట్ల, తల్లి పట్ల అనుచిత వ్యాఖ్యలు చేయడం ఎంత వరకు సమంజసమని సీఎం రేవంత్ రెడ్డి (Revanth Reddy) అసెంబ్లీ వేదికగా ప్రశ్నించారు. మాతృమూర్తిని పూజించే సంస్కృతి ఉన్న మన సమాజంలో, స్పీకర్ స్థానాన్ని అవమానించడం ప్రజాస్వామ్యానికే గొడ్డలిపెట్టని మండిపడ్డారు. బీఆర్ఎస్ సభ్యులకు స్పీకర్ పై కోపం ఉన్నట్టుందని సీఎం ఆరోపించారు.
ప్రభుత్వ విధానాలపై నిరసన తెలిపేందుకు ఎన్నో ప్రజాస్వామ్య మార్గాలు ఉన్నప్పటికీ, బీఆర్ఎస్ సభ్యులు బరితెగించి అనుచిత భాషను ఉపయోగించారని రేవంత్ రెడ్డి (Revanth Reddy) విమర్శించారు. అసెంబ్లీలో వారు మాట్లాడిన తీరును సభలోని అన్ని రాజకీయ పార్టీలు ముక్తకంఠంతో ఖండించాయని తెలిపారు. తమ వైఫల్యాలు ఎక్కడ బయటపడతాయోనన్న భయంతోనే ఫామ్‌హౌస్‌లో ముందస్తు కుట్ర పన్ని, సభ సజావుగా సాగకుండా ప్లాన్ చేశారని ఆరోపించారు. సభ గౌరవాన్ని మంటగలుపుతూ బీఆర్ఎస్ నాయకత్వం తమ సభ్యులను ఉన్మాదులుగా మార్చిందంటూ సీఎం తీవ్ర స్థాయిలో విరుచుకుపడ్డారు.
ప్రత్యేక విచారణకు సీఎం రేవంత్ ఆదేశం..
తెలంగాణ అసెంబ్లీ సమీపంలో జరిగిన ఘటన, విద్వేషపూరిత చర్యల వెనుక ఉన్న కుట్రలను ఛేదించేందుకు సీఎం రేవంత్ రెడ్డి ప్రత్యేక విచారణకు ఆదేశించారు. ఫామ్‌హౌస్‌లు కేంద్రంగా కుట్రలు పన్నుతూ సమాజంలో విద్వేషాలు రేకెత్తించే వారిపై ప్రభుత్వం కఠినంగా వ్యవహరిస్తుందని స్పష్టం చేశారు. ఈ వ్యవహారంపై సమగ్ర విచారణ జరిపే బాధ్యతను హైదరాబాద్ జాయింట్ కమిషనర్ విజయ్ కుమార్‌కు అప్పగిస్తున్నట్లు వెల్లడించారు. ఈ కుట్రల వెనుక ఎవరున్నా, వాటిని అమలు చేసిన వారైనా సరే వదిలిపెట్టేది లేదని, అందరినీ కోర్టు ముందు నిలబెట్టి తగిన శిక్ష పడేలా చూస్తామని హెచ్చరించారు.
Also Read : సభా గౌరవాన్ని మంటగలపొద్దు: ఎంపీ కడియం కావ్య
Follow Us On: X(Twitter)
