కలం, స్పోర్ట్స్: పాకిస్థాన్ అండర్-19 జట్టు 18 ఏళ్ల యువ ఫాస్ట్ బౌలర్ ఆలీ రజా (Pakistan U19 Pacer Ali Raza) తన బౌలింగ్‌తో క్రికెట్ వర్గాల దృష్టిని ఆకర్షిస్తున్నారు. పలు వయోపరిమితి టోర్నీల్లో అద్భుత ప్రదర్శన చేస్తూ దేశంలోనే అత్యుత్తమ బౌలింగ్ ప్రతిభావంతుడిగా గుర్తింపు పొందారు. ఆలీ రజా బౌలింగ్ శైలిని సమీక్షించిన పాకిస్థాన్ మాజీ వేగవంతమైన బౌలర్ మహమ్మద్ జాహిద్, ఈ యువ క్రికెటర్‌లో ఇంకా మెరుగుపడాల్సిన అంశాలు చాలా ఉన్నాయని తెలిపారు. రాబోయే రోజుల్లో ఆలీ రజా తన బౌలింగ్ వేగాన్ని మరో 10 నుంచి 15 కిలోమీటర్లు పెంచుకునే అవకాశం ఉందని ఆయన అంచనా వేశారు. ఒకవేళ అతడు 155 కిలోమీటర్ల వేగంతో బంతులు విసిరితే, ప్రస్తుత తరం బ్యాటర్లు అతడిని ఎదుర్కోవడం ఎంతో కష్టమవుతుందని వ్యాఖ్యానించారు.
ఆలీ రజా ఇప్పటికే అంతర్జాతీయ దిగ్గజాలకు సమానమైన వేగంతో బౌలింగ్ చేస్తున్నారు. ఇటీవల ఒక టీ20 మ్యాచ్‌లో గంటకు 149.1 కిలోమీటర్ల వేగంతో బంతిని విసిరి అందరినీ ఆశ్చర్యపరిచారు. ఇక ఆసియా క్రికెట్ కౌన్సిల్ అండర్-19 ఆసియా కప్‌లో రెండు మ్యాచ్‌లలో 15 సగటుతో 5 వికెట్లు పడగొట్టి తన నిలకడను నిరూపించుకున్నారు. గత 2024 అండర్-19 ప్రపంచ కప్‌లో కేవలం 15 ఏళ్ల వయస్సులోనే బరిలోకి దిగిన రజా, మూడు మ్యాచ్‌లలో 9 వికెట్లు తీశారు. ముఖ్యంగా ఆస్ట్రేలియాతో జరిగిన సెమీఫైనల్‌లో 34 పరుగులిచ్చి 4 వికెట్లు సాధించి సంచలనం సృష్టించారు. ఇక ఈ ఏడాది జరిగిన అండర్-19 ప్రపంచ కప్‌లో ఐదు మ్యాచ్‌లలోనే 13.92 సగటుతో 13 వికెట్లు పడగొట్టి పాకిస్థాన్ భవిష్యత్తు బౌలింగ్ ఆశాకిరణంగా మారారు.
