కలం, నిర్మల్: ఒకప్పుడు పండుగ వచ్చిందంటే నిర్మల్ పట్టణంలోని ప్రధాన వాణిజ్య ప్రాంతాలు జనసందోహంతో కిక్కిరిసిపోయేవి. ముఖ్యంగా గంగా కాంప్లెక్స్, నారాయణరెడ్డి కాంప్లెక్స్, పాత బస్టాండ్ పరిసరాల్లోని వస్త్ర దుకాణాలు (Nirmal Textile Markets) కస్టమర్లతో కళకళలాడేవి. దసరా, దీపావళి, సంక్రాంతి వంటి పండుగల సమయంలో నిర్మల్తో పాటు పరిసర గ్రామాల నుంచి పెద్ద సంఖ్యలో ప్రజలు పట్టణానికి చేరుకుని వస్త్రాలు, ఇతర వస్తువులు కొనుగోలు చేసేవారు. వ్యాపారులు సైతం పండుగ సీజన్ కోసం నెలల ముందుగానే ఏర్పాట్లు చేసుకునేవారు.
అయితే కాలం మారడంతో వ్యాపార విధానాలు, వినియోగదారుల కొనుగోలు తీరు కూడా మారిపోయింది. పట్టణంలో వరుసగా పెద్ద షాపింగ్ మాల్స్ (New Shopping Malls) అందుబాటులోకి రావడం, అక్కడ వివిధ రకాల బ్రాండ్లు, ప్రత్యేక ఆఫర్లు, డిస్కౌంట్లు లభిస్తుండటంతో వినియోగదారుల దృష్టి మాల్స్ వైపు మళ్లుతోందని పాత మార్కెట్లోని పలువురు వ్యాపారులు చెబుతున్నారు. దీంతో ఒకప్పుడు కిటకిటలాడిన గంగా, నారాయణరెడ్డి కాంప్లెక్స్లలో ఇప్పుడు గిరాకీ కోసం ఎదురుచూడాల్సిన పరిస్థితి ఏర్పడిందని ఆవేదన వ్యక్తం చేస్తున్నారు.
జిల్లా ఏర్పాటుతో మారిన వ్యాపార ముఖచిత్రం
నిర్మల్ జిల్లా ఏర్పడకముందు నుంచే గంగా కాంప్లెక్స్, నారాయణరెడ్డి కాంప్లెక్స్లలో అనేక మంది వ్యాపారులు వస్త్ర దుకాణాలు నిర్వహిస్తున్నారు. వ్యాపారం కొనసాగుతుందనే నమ్మకంతో కొందరు లక్షల్లో అడ్వాన్స్లు చెల్లించి దుకాణాలను అద్దెకు తీసుకున్నట్లు వ్యాపారులు చెబుతున్నారు. అప్పట్లో పండుగ సీజన్లో వచ్చే గిరాకీతో పెట్టుబడులు, అద్దెలు, ఇతర నిర్వహణ ఖర్చులు భరించగలిగేవారమని పేర్కొంటున్నారు. కానీ పట్టణంలో కొత్త వాణిజ్య కేంద్రాలు, షాపింగ్ మాల్స్ ఒక్కొక్కటిగా అందుబాటులోకి రావడంతో పరిస్థితి మారిందని అంటున్నారు. ఒకే ప్రదేశంలో అనేక బ్రాండ్లు, వస్త్రాలు, ఫ్యాషన్ ఉత్పత్తులు లభించడం, పండుగల సందర్భంగా ప్రత్యేక ఆఫర్లు, డిస్కౌంట్లు ప్రకటించడం వంటి అంశాలు వినియోగదారులను ఆకర్షిస్తున్నాయని వ్యాపారులు అభిప్రాయపడుతున్నారు.
ఆనంద్తో మొదలై.. వరుసగా మాల్స్
నిర్మల్లో పెద్ద షాపింగ్ మాల్స్ ప్రభావం క్రమంగా పెరిగిందని వ్యాపార వర్గాలు చెబుతున్నాయి. శివాజీ చౌక్ ప్రాంతంలో ఆనంద్ షాపింగ్ మాల్ ఏర్పాటుతో మొదలైన మార్పు.. అనంతరం కిసాన్, ఎల్వీఆర్ వంటి షాపింగ్ మాల్స్ రాకతో మరింత స్పష్టంగా కనిపించిందని చిన్న దుకాణాల యజమానులు చెబుతున్నారు. మాల్స్లో పండుగ సీజన్ను దృష్టిలో పెట్టుకుని ప్రత్యేక ఆఫర్లు, డిస్కౌంట్లు ప్రకటించడం, ఒకే ప్రదేశంలో కుటుంబంలోని అందరికీ అవసరమైన వస్తువులు లభించడం తమ వ్యాపారంపై ప్రభావం చూపుతోందని వారు పేర్కొంటున్నారు.
పండుగ సీజన్లోనూ కనిపించని పాత కళ
ప్రస్తుతం దసరా సీజన్ ప్రారంభమైనప్పటికీ గతంలో కనిపించిన సందడి గంగా, నారాయణరెడ్డి కాంప్లెక్స్లలో కనిపించడం లేదని స్థానిక వ్యాపారులు చెబుతున్నారు. పండుగకు ముందే దుకాణాల వద్ద రద్దీ పెరగాల్సి ఉండగా, చాలాచోట్ల కస్టమర్ల కోసం దుకాణదారులు ఎదురుచూస్తున్న పరిస్థితి ఉందని వాపోతున్నారు.
అద్దెలు.. కరెంటు బిల్లులు.. సిబ్బంది జీతాలు
గిరాకీ తగ్గినా దుకాణాల నిర్వహణ ఖర్చులు మాత్రం తగ్గడం లేదని వ్యాపారులు చెబుతున్నారు. నెలనెలా అద్దె, విద్యుత్ బిల్లులు, సిబ్బంది జీతాలు, ఇతర నిర్వహణ ఖర్చులు భరించాల్సి వస్తోందని పేర్కొంటున్నారు. ఆదాయం తగ్గిపోతున్నా ఖర్చులు యథాతథంగా ఉండటంతో చిన్న వ్యాపారులపై ఆర్థిక భారం పెరుగుతోందని అంటున్నారు. లక్షల్లో అడ్వాన్స్లు చెల్లించి దుకాణాలు తీసుకున్న తమకు ఇప్పుడు వ్యాపారం కొనసాగించాలా.. దుకాణాలు ఖాళీ చేయాలా అనే పరిస్థితి ఏర్పడుతోందని కొందరు వ్యాపారులు ఆవేదన వ్యక్తం చేస్తున్నారు.
పోటాపోటీగా కార్పొరేట్ మాల్స్
దసరా సీజన్ను లక్ష్యంగా చేసుకుని నిర్మల్లో మరిన్ని పెద్ద షాపింగ్ మాల్స్ రాబోతుండటంతో పాత మార్కెట్ వ్యాపారుల్లో ఆందోళన మరింత పెరుగుతోంది. అక్టోబర్ 1న చెన్నై, చందన బ్రదర్స్ షాపింగ్ మాల్స్ ప్రారంభానికి ఏర్పాట్లు పూర్తయ్యాయని ప్రచారం జరుగుతోంది. పట్టణంతో పాటు పరిసర గ్రామాల్లోనూ కొద్ది రోజులుగా భారీ స్థాయిలో ప్రచారం నిర్వహిస్తున్నారు. ఆటోలు, భారీ హోర్డింగులు, ఇతర ప్రచార మార్గాల ద్వారా వినియోగదారులను ఆకట్టుకునే ప్రయత్నాలు సాగుతున్నాయి. మరోవైపు మాంగల్య షాపింగ్ మాల్ కూడా దసరా సీజన్లో ప్రారంభానికి సిద్ధమవుతున్నట్లు వ్యాపార వర్గాల్లో చర్చ జరుగుతోంది. ఇప్పటికే ఉన్న మాల్స్కు తోడు కొత్త కార్పొరేట్ షాపింగ్ కేంద్రాలు అందుబాటులోకి వస్తే నిర్మల్ వస్త్ర వ్యాపార రంగంలో పోటీ మరింత పెరగనుంది.
చిన్న వ్యాపారులకు సవాల్
ఒకప్పుడు పండుగలొస్తే వేలాది అడుగులతో సందడిగా మారిన గంగా కాంప్లెక్స్, నారాయణరెడ్డి కాంప్లెక్స్లు ఇప్పుడు గిరాకీ కోసం ఎదురుచూస్తున్నాయి. మారుతున్న వాణిజ్య పరిస్థితులకు అనుగుణంగా చిన్న వ్యాపారులు కూడా తమ వ్యాపార విధానాలను మార్చుకోవాల్సిన అవసరం ఏర్పడింది. వినియోగదారులను ఆకట్టుకునేందుకు కొత్త ఆఫర్లు, మెరుగైన సేవలు, ఆధునిక మార్కెటింగ్ విధానాలను అనుసరించాల్సిన పరిస్థితి నెలకొంది.
