కలం, స్పోర్ట్స్ : బ్రెజిల్ ఫుట్బాల్ దిగ్గజం, అత్యధిక గోల్స్ చేసిన ఆటగాడు నెయ్మార్ (Neymar) అంతర్జాతీయ ఫుట్బాల్ నుంచి తప్పుకున్నారు. 16 ఏళ్లకు పైగా జాతీయ జట్టుకు అందించిన సేవలకు ఆయన అధికారికంగా ముగింపు పలికారు. 2026 ఫిఫా ప్రపంచ కప్లో నార్వే చేతిలో బ్రెజిల్ రౌండ్ ఆఫ్ 16లో ఓడిపోయి టోర్నీ నుంచి నిష్క్రమించింది. ఆ మ్యాచే జాతీయ జట్టు తరఫున నెయ్మార్కు చివరిది అయింది. ఆ తర్వాత తన అంతర్జాతీయ భవిష్యత్తుపై వస్తున్న ఊహాగానాలకు ముగింపు పలికారు.
కోపా సుడామెరికానా టోర్నీలో వెనిజులాకు చెందిన యూనివర్సిడాడ్ సెంట్రల్పై సాంటోస్ క్లబ్ 4-2తో విజయం సాధించిన తర్వాత 34 ఏళ్ల నెయ్మార్ తన వీడ్కోలు నిర్ణయాన్ని వెల్లడించారు. దేశానికి ప్రాతినిధ్యం వహించినందుకు తనకు ఎలాంటి విచారం లేదని నెయ్మార్ స్పష్టం చేశారు. జాతీయ జట్టు కోసం ఎల్లప్పుడూ తన శక్తివంచన లేకుండా శ్రమించానని తెలిపారు. బ్రెజిల్ పసుపు రంగు జెర్సీ కోసం ప్రాణమిచ్చి పోరాడానని, అయితే ఇకపై కొనసాగకూడదని భావిస్తున్నట్లు ఆయన చెప్పారు.
జాతీయ జట్టుతో తన సమయం ముగిసిందని, చరిత్ర సృష్టించినందుకు చాలా సంతోషంగా ఉందని పేర్కొన్నారు. బ్రెజిల్ జాతీయ జట్టు తరఫున నెయ్మార్ ఎన్నో ప్రపంచ కప్లు, కోపా అమెరికా, ఒలింపిక్ టోర్నమెంట్లలో పాల్గొన్నారు. అత్యధిక గోల్స్ చేసిన క్రీడాకారుడిగా నిలిచి అద్భుతమైన రికార్డులను నెలకొల్పారు. ఇకపై ఆయన పూర్తి దృష్టిని సాంటోస్ క్లబ్ కెరీర్పైనే పెట్టనున్నారు. లీగ్ మ్యాచ్ తర్వాత డ్రెస్సింగ్ రూమ్లో యువ ఆటగాళ్లను భయపెట్టారంటూ వచ్చిన వార్తలను కూడా ఆయన ఖండించారు.
జట్టు ఆటతీరు మరింత మెరుగ్గా ఉండాలనే ఉద్దేశంతోనే తాను మాట్లాడానని స్పష్టం చేశారు. బాధ్యతారాహిత్యంగా డ్రా చేసుకోవడం సరికాదని, కెప్టెన్గా మాట్లాడే హక్కు తనకు ఉందని అన్నారు. జట్టులోని ఇతర సీనియర్ ఆటగాళ్లు లూకాస్ వెరిసిమో, గాబిగోల్ కూడా ఆటగాళ్లతో మాట్లాడారని చెప్పారు. ఇలాంటి అసత్య ప్రచారాలు రావడం బాధాకరమని ఆవేదన వ్యక్తం చేశారు. ఈ వివాదాల మధ్యనే సాంటోస్ క్లబ్ విజయంలో నెయ్మార్ కీలక పాత్ర పోషించారు.
