కలం, స్పోర్ట్స్: టీమ్ ఇండియా గాయాల సమస్యపై మాజీ బ్యాటర్ మహ్మద్ కైఫ్ (Mohammad Kaif) ఆందోళన వ్యక్తం చేశాడు. ఆటగాళ్ల గాయాలను బీసీసీఐ తేలిగ్గా తీసుకుంటోందని అభిప్రాయపడ్డాడు. వైద్య వ్యవస్థలో సమస్యలను వెంటనే పరిష్కరించాల్సిన అవసరం ఉందని పేర్కొన్నాడు. ఇటీవల కీలక ఆటగాళ్లు మ్యాచ్లకు దూరం కావడాన్ని కైఫ్ ప్రస్తావించాడు. లార్డ్స్లో జరిగిన కీలక వన్డేలో జస్ప్రీత్ బుమ్రా ఆడకపోవడంతో భారత్ 387 పరుగులు ఇచ్చిందని గుర్తు చేశాడు.
ఆ మ్యాచ్కు ముందు సిరీస్ 1-1తో సమంగా ఉందని కైఫ్ పేర్కొన్నాడు. అలాంటి కీలక మ్యాచ్లో గాయాల కారణంగా ఆటగాళ్లు అందుబాటులో లేకపోవడం ఆందోళన కలిగించే విషయమని తెలిపాడు. బీసీసీఐ సెంటర్ ఆఫ్ ఎక్సలెన్స్లో వైద్య నిపుణుల నియామకంపై కూడా కైఫ్ ప్రశ్నలు లేవనెత్తాడు. వీవీఎస్ లక్ష్మణ్ గతంలో పలువురు వైద్య నిపుణులను సంప్రదించినట్లు చెప్పిన విషయాన్ని ప్రస్తావించాడు.
అయితే చివరి దశలో కొందరు ఆ ప్రతిపాదనలను తిరస్కరించినట్లు తెలిపాడు. సెంటర్ ఆఫ్ ఎక్సలెన్స్లో హెడ్ ఆఫ్ స్పోర్ట్స్ సైన్స్ అండ్ మెడిసిన్ పదవి కూడా ఖాళీగా ఉంది. నితిన్ పటేల్ 2025 మార్చిలో పదవి నుంచి తప్పుకున్న తర్వాత, సీనియర్ ఫిజియోథెరపిస్ట్ ధనంజయ్ కౌశిక్ తాత్కాలికంగా బాధ్యతలు చూస్తున్నారు. ప్రపంచ స్థాయి ఫిజియోథెరపిస్టులు, వైద్య నిపుణులను బీసీసీఐతో పనిచేసేలా చేయడంలో ఎందుకు ఆలస్యం జరుగుతోందని కైఫ్ ప్రశ్నించాడు.
బీసీసీఐ మంచి కాంట్రాక్టులు, పారితోషికం అందించే స్థితిలో ఉన్నప్పటికీ ఈ సమస్య కొనసాగడం ఆశ్చర్యంగా ఉందని పేర్కొన్నాడు. ఇక ఆగస్టు 15 నుంచి శ్రీలంకతో ప్రారంభమయ్యే టెస్టు సిరీస్కు ముందు పలువురు భారత ఆటగాళ్లు గాయాలతో ఇబ్బంది పడుతున్నారు. హర్షిత్ రాణా, వాషింగ్టన్ సుందర్, నితీశ్ కుమార్ రెడ్డి, ఆకాశ్ దీప్ కోలుకుంటున్నారు. జస్ప్రీత్ బుమ్రా మాత్రం టెస్టు సిరీస్కు దూరమయ్యాడు.
