కలం, స్పోర్ట్స్ : జాన్ డియర్ క్లాసిక్ (John Deere Classic) గోల్ఫ్ టోర్నమెంట్ ఆఖరి రౌండ్కు చేరుకుంది. టీపీసీ డియర్ రన్ వేదికగా జరుగుతున్న ఈ పోటీల్లో మూడో రోజు ఆట ముగిసేసరికి అమెరికా ఆటగాళ్లు లూకాస్ గ్లోవర్, లీ హాడ్జెస్ 16-అండర్ పార్ స్కోరుతో సంయుక్తంగా అగ్రస్థానంలో నిలిచారు. ఈ టోర్నీ ప్రారంభం నుంచే లూకాస్ గ్లోవర్ అద్భుతమైన ఫామ్లో ఉన్నాడు. గురువారం జరిగిన మొదటి రౌండ్లోనే అతను అత్యుత్తమంగా 63 స్కోరు సాధించాడు. ఇక్కడ పోటీ ఎప్పుడూ హోరాహోరీగా ఉంటుందని గ్లోవర్ వ్యాఖ్యానించాడు. అతను గురువారం నుండి తన ఆధిక్యాన్ని కాపాడుకుంటూ వస్తున్నాడు.
శనివారం జరిగిన మూడో రౌండ్లో గ్లోవర్ రెండో హోల్ వద్ద ఈ వారం తన మొదటి ఈగిల్ను నమోదు చేశాడు. కానీ తొమ్మిదో హోల్ వద్ద బోగీ చేయడంతో ఒక షాట్ కోల్పోయాడు. చివర్లో 17వ హోల్ వద్ద సాధించిన బర్డీతో అతను ఉమ్మడి లీడర్గా నిలిచాడు. మరోవైపు లీ హాడ్జెస్ మూడో రౌండ్ ప్రారంభానికి ముందు గ్లోవర్ కంటే రెండు స్ట్రోక్స్ వెనుకబడి ఉన్నాడు. మూడో రోజు ఆటలో అతను 4-అండర్ 67 స్కోరుతో అదరగొట్టి అగ్రస్థానానికి చేరుకున్నాడు.
హాడ్జెస్ రెండో హోల్, ఐదో హోల్ వద్ద బర్డీలు సాధించాడు. ఆ తర్వాత ఆరో, ఎనిమిదో హోల్స్ వద్ద వరుసగా బోగీలు చేయడంతో కాస్త వెనుకబడ్డాడు. కానీ ఆ తర్వాత కోలుకుని 12, 14, 15, 17వ హోల్స్ వద్ద వరుస బర్డీలతో రోజంతా అగ్రస్థానంలో నిలిచాడు. ప్రస్తుతం వీరిద్దరికీ గట్టి పోటీ ఇస్తూ బెన్ కోహ్లెస్, జాక్సన్ సుబెర్, జాక్ బ్లెయిర్ 15-అండర్ పార్ స్కోరుతో రెండో స్థానంలో ఉన్నారు.
అలాగే టాప్-10 రేసులో అమెరికాకు చెందిన అగ్రశ్రేణి అమెచ్యూర్ ప్లేయర్ ప్రెస్టన్ స్టౌట్, జపాన్కు చెందిన రియో హిసాట్సునే కూడా ఉన్నారు. ఈ టోర్నీలో ఇండో-కెనడియన్ ప్లేయర్ సుదర్శన్ యల్లామరాజు ముందే కట్ కోల్పోగా.. అక్షయ్ భాటియా, సాహిత్ తీగల, ఆరోన్ రాయ్ ఈ వారం బరిలోకి దిగలేదు.
