కలం, వెబ్ డెస్క్ : బీఆర్ఎస్ అధినేత కల్వకుంట్ల చంద్రశేఖర్ రావు (KCR) ఎర్రవల్లి నివాసం నుండి హైదరాబాద్కు పయనమయ్యారు. పార్టీ ఆవిర్భావ దినోత్సవం సందర్భంగా తెలంగాణ భవన్లో ఏర్పాటు చేసిన రజతోత్సవ వేడుకల ముగింపు సమావేశానికి ఆయన హాజరుకానున్నారు.
మరికాసేపట్లో ప్రారంభం కానున్న ఈ వేడుకల కోసం పార్టీ యంత్రాంగం అన్ని ఏర్పాట్లను పూర్తి చేసింది. దశాబ్దాల రాజకీయ ప్రస్థానం, పార్టీ సాధించిన విజయాలను గుర్తుచేసుకుంటూ నిర్వహించే ఈ ముగింపు సమావేశంపై సర్వత్రా ఆసక్తి నెలకొంది. పార్టీ కార్యకర్తలు, ముఖ్య నేతలు ఇప్పటికే భారీగా తెలంగాణ భవన్కు చేరుకుంటున్నారు. రాబోయే రాజకీయ కార్యాచరణపై ఈ సమావేశంలో అధినేత దిశానిర్దేశం చేసే అవకాశం కనిపిస్తోంది.
కేసీఆర్ నివాసంలో నీటి కొరత..
మాజీ ముఖ్యమంత్రి నివాసానికి కూడా నీటి కొరత సెగ తగిలింది. పార్టీ ఆవిర్భావ దినోత్సవ వేడుకల కోసం ఆయన హైదరాబాద్ చేరుకుంటున్న తరుణంలో ఈ పరిస్థితి వెలుగులోకి రావడం చర్చనీయాంశంగా మారింది. కేసీఆర్ రాకను పురస్కరించుకుని ఆయన నివాసంలో అవసరాల కోసం సిబ్బంది ముందస్తుగా వాటర్ ట్యాంకర్ను తెప్పించారు. ముఖ్యమంత్రి నివాసం వద్ద నీటి ట్యాంకర్ కనిపిస్తుండటంతో అటుగా వెళ్తున్న స్థానికులు ఆశ్చర్యం వ్యక్తం చేస్తున్నారు.
