కలం, స్పోర్ట్స్ : జపాన్ మాస్టర్స్‌లో (Japan Masters 2026) భారత స్టార్ షట్లర్లు కిదాంబి శ్రీకాంత్, లక్ష్య సేన్ అదరగొట్టారు. కుమమోటో ప్రిఫెక్చురల్ జిమ్నాజియంలో గురువారం జరిగిన మ్యాచ్‌లలో వీరిద్దరూ విజయం సాధించి క్వార్టర్ ఫైనల్‌కు దూసుకెళ్లారు. అయితే డబుల్స్ విభాగంలో మాత్రం భారత్‌కు నిరాశ ఎదురైంది.
మాజీ ప్రపంచ నంబర్ వన్ కిదాంబి శ్రీకాంత్, ప్రపంచ 8వ ర్యాంకర్ కొడై నరోకాకు ఊహించని షాక్ ఇచ్చాడు. గతంలో నరోకా చేతిలో నాలుగుసార్లు ఓడిన శ్రీకాంత్ ఈసారి ఆ రికార్డును తిరగరాశాడు. మొదటి గేమ్‌లో 12-14తో వెనుకబడినప్పటికీ, వరుసగా ఏడు పాయింట్లు సాధించి 21-15తో గేమ్‌ను సొంతం చేసుకున్నాడు. రెండో గేమ్‌లో జపాన్ ఆటగాడు పుంజుకోవడంతో మ్యాచ్ నిర్ణయాత్మక మూడో గేమ్‌కు చేరింది. చివరి గేమ్‌లో 7-7 వద్ద స్కోరు సమం చేసిన శ్రీకాంత్, ఆపై పట్టు బిగించి 21-18తో విజయం సాధించాడు. గంట పాటు సాగిన ఉత్కంఠ పోరులో శ్రీకాంత్ పైచేయి సాధించాడు. ఈ ఏడాది యూఎస్ ఓపెన్‌లో రన్నరప్‌గా నిలిచిన శ్రీకాంత్, చైనా మాస్టర్స్ క్వార్టర్స్‌కు కూడా చేరుకున్నాడు.
మరోవైపు, ఇటీవలే హైలో ఓపెన్ గెలిచిన లక్ష్య సేన్ తన జోరును కొనసాగించాడు. చైనా ఆటగాడు డాంగ్ టియాన్ యావోపై 21-8, 21-14 తేడాతో కేవలం 35 నిమిషాల్లోనే సునాయాస విజయం సాధించాడు. క్వార్టర్ ఫైనల్‌లో శ్రీకాంత్ జపాన్‌కు చెందిన కోకి వటనాబెతో, లక్ష్య సేన్ యుషి తనకాతో తలపడనున్నారు. సింగిల్స్‌లో భారత్ సత్తా చాటినా, డబుల్స్ విభాగంలో మాత్రం ప్రయాణం ముగిసింది. పురుషుల డబుల్స్ ప్రీ-క్వార్టర్స్‌లో హరిహరన్ అమ్సకరుణన్-ఎంఆర్ అర్జున్ జోడీ 14-21, 14-21 తేడాతో జపాన్ జంట చేతిలో ఓడిపోయింది. మహిళల డబుల్స్‌లో ట్రీసా జాలీ-గాయత్రి గోపీచంద్ జోడీ కూడా 14-21, 14-21 తేడాతో జపాన్ క్రీడాకారిణుల చేతిలో పరాజయం పాలైంది.
