కలం, స్పోర్ట్స్: గ్లాస్గోలో 2026 కామన్వెల్త్ గేమ్స్ (Commonwealth Games) ముగిశాయి. భారత క్రీడాకారులు 13 స్వర్ణాలు, 17 రజతాలు, 9 కాంస్యాలతో మొత్తం 39 పతకాలు సాధించారు. ఆస్ట్రేలియా, ఇంగ్లాండ్, కెనడాల తర్వాత భారత్ నాలుగో స్థానంలో నిలిచింది. ఈసారి షూటింగ్, రెజ్లింగ్, బ్యాడ్మింటన్, టేబుల్ టెన్నిస్, హాకీ పోటీలు లేవు. దాంతో గతంలో కంటే 22 పతకాలు తగ్గాయి. బాక్సింగ్, అథ్లెటిక్స్లలో చెరో 10 పతకాలు వచ్చాయి. వెయిట్లిఫ్టింగ్లో 8, పారా అథ్లెటిక్స్లో 6 పతకాలు దక్కాయి. అలీగఢ్కు చెందిన నాయిబ్ సుబేదార్ గుల్వీర్ సింగ్ ఒకే ఎడిషన్లో రెండు పతకాలు గెలిచిన తొలి భారత ట్రాక్ అండ్ ఫీల్డ్ అథ్లెట్గా నిలిచాడు.
అతడు 10,000 మీటర్లలో రజతం, 5,000 మీటర్లలో కాంస్యం సాధించాడు. అతడు అమెరికాలోని కొలరాడో స్ప్రింగ్స్లో శిక్షణ పొందుతున్నాడు. అథ్లెట్ల ఈ ప్రదర్శన వెనుక ప్రభుత్వం అందించిన ఆర్థిక సాయం ఎంతో ఉంది. ‘టార్గెట్ ఒలింపిక్ పోడియం స్కీమ్’ (TOPS), ‘ఏసీటీసీ’ (ACTC) ద్వారా కోట్ల రూపాయలు వెచ్చించారు. స్టార్ అథ్లెట్ నీరజ్ చోప్రాకు TOPS ద్వారా రూ. 3.27 కోట్లు, ACTC ద్వారా రూ. 3.38 కోట్లు దక్కాయి. వెయిట్లిఫ్టింగ్ స్వర్ణ విజేత మీరాబాయి చానుకు TOPS ద్వారా రూ. 1.66 కోట్లు, ACTC ద్వారా రూ. 14.01 లక్షలు అందాయి.
లవ్లీనా బోర్గొహైన్కు ACTC ద్వారా రూ. 59.03 లక్షలు, గుల్వీర్ సింగ్కు TOPS నుంచి రూ. 30.40 లక్షలు, ACTC నుంచి రూ. 25.32 లక్షలు సహాయం లభించింది. పోటీల ముందు మన అథ్లెట్లు పోలాండ్, బెల్ఫాస్ట్, బర్మింగ్హామ్, సౌత్ ఎసెక్స్లలో ప్రత్యేక విదేశీ శిక్షణ తీసుకున్నారు. 2014లో ప్రారంభమైన TOPS పథకాన్ని ప్రస్తుతం 2008 ఒలింపియన్ కల్నల్ నచ్ఛతర్ సింగ్ జోహల్ పర్యవేక్షిస్తున్నారు. ఇటీవల ఈ పథకంలో ప్రాధాన్యత ఇచ్చే క్రీడల సంఖ్యను 27కి పెంచారు.
ఈ పథకంలో క్రీడాకారులను కోర్ గ్రూప్, డెవలప్మెంట్ గ్రూప్లుగా విభజించి నిధులు ఇస్తారు. విదేశీ శిక్షణ, కోచింగ్, స్పోర్ట్స్ సైన్స్, ఫిజియోథెరపీ, మానసిక దృఢత్వం వంటి సదుపాయాలను అందిస్తారు. ప్రదర్శన ఆధారంగా ఎప్పటికప్పుడు సమీక్షలు ఉంటాయి. రాబోయే ఆసియా గేమ్స్, 2028 ఒలింపిక్స్, 2036లో భారత్ ప్రతిపాదిత ఒలింపిక్స్ ఆతిథ్యాన్ని దృష్టిలో ఉంచుకుని ‘కేలో ఇండియా’, జాతీయ క్రీడా సమాఖ్యలకు ప్రభుత్వం రూ. 36,441 కోట్లు కేటాయించింది.
