క‌లం, స్పోర్ట్స్: ఆసియా ఛాంపియన్స్ ట్రోఫీ (Asia Champions Trophy) 2026 హాకీ టోర్నమెంట్‌లో భారత జట్టు విజయభేరి మోగించింది. సోమవారం జరిగిన చివరి లీగ్ మ్యాచ్‌లో సౌత్ కొరియాను 8-0 తో చిత్తు చేసింది. ఒకే ఒక్క గోల్ కూడా ఇవ్వకుండా ప్రత్యర్థిని కట్టడి చేసిన భారత్, అజేయంగా సెమీఫైనల్‌కు దూసుకెళ్లింది. భారత జట్టు అంతకుముందు జరిగిన మ్యాచ్‌లో కెప్టెన్ హర్మన్‌ప్రీత్ సింగ్ సాధించిన హ్యాట్రిక్ గోల్స్ సాయంతో మలేషియాపై 4-2 తో విజయం సాధించింది. ఆ గెలుపు ఉత్సాహంతోనే సోమవారం కొరియాతో తలపడింది.
మ్యాచ్ ప్రారంభం నుంచే భారత్ పూర్తి ఆధిపత్యం ప్రదర్శించింది. మొదటి క్వార్టర్ ముగిసే సమయానికే భారత్ మూడు గోల్స్ చేసి కొరియాపై ఒత్తిడి పెంచింది. విష్ణుకాంత్ సింగ్ అందించిన అద్భుతమైన పాస్‌ను అందుకుని జుగ్‌రాజ్ సింగ్ భారత్‌కు రెండో గోల్ అందించగా, ఆ వెంటనే లభించిన పెనాల్టీ కార్నర్‌ను కెప్టెన్ హర్మన్‌ప్రీత్ సింగ్ గోల్‌గా మలిచాడు. దాంతో తొలి క్వార్టర్ ముగిసేసరికి భారత్ 3-0 ఆధిక్యంలో నిలిచింది. రెండో క్వార్టర్‌లో కొరియా గట్టి పోటీ ఇచ్చినప్పటికీ, హాఫ్ టైమ్ వరకు భారత్ తన ఆధిక్యాన్ని కాపాడుకుంది.
ఇక మూడో క్వార్టర్ మొదలైన వెంటనే భారత ఆటగాళ్లు మరింత చెలరేగిపోయారు. షిలానంద్ లాక్రా, సుఖ్‌జీత్ సింగ్, సంజయ్, దిల్‌ప్రీత్ సింగ్ వరుసగా గోల్స్ చేయడంతో స్కోరు 7-0 కి చేరింది. చివరి క్వార్టర్ ముగిసే కొద్ది నిమిషాల ముందు అంగద్ బీర్ సింగ్ ఎనిమిదో గోల్ కొట్టి కొరియా ఆశలపై నీళ్లు చల్లాడు. మ్యాచ్ చివరి క్షణాల్లో కొరియాకు రెండు పెనాల్టీ కార్నర్లు లభించినా, భారత డిఫెన్స్ వాటిని సమర్థవంతంగా అడ్డుకుంది. టోర్నమెంట్‌లో వరుసగా ఐదో విజయాన్ని నమోదు చేసుకున్న భారత్, పాయింట్ల పట్టికలో అగ్రస్థానాన్ని మరింత పదిలం చేసుకుంది. స్వదేశంలో జరుగుతున్న ఈ టోర్నీలో కచ్చితంగా గోల్డ్ మెడల్ గెలవడమే తమ లక్ష్యమని కెప్టెన్ హర్మన్‌ప్రీత్ సింగ్ మ్యాచ్‌కు ముందే స్పష్టం చేశారు.
