కలం, స్పోర్ట్స్: కామన్వెల్త్ గేమ్స్లో (Commonwealth Games) భారత జిమ్నాస్టిక్స్ జట్టుకు గట్టి ఎదురుదెబ్బ తగిలింది. ఎనిమిది మంది బరిలోకి దిగినా ఒక్క పతకం కూడా దక్కలేదు. ప్రతిష్ఠా సమంత ఏడో స్థానంతోనే భారత్కు అత్యుత్తమ ఫలితం లభించింది. భారత్ ఎనిమిది మంది సభ్యులతో పోటీలో పాల్గొంది. అయితే ఒక్క పతకం కూడా సాధించలేకపోయింది. ప్రతిష్ఠా సమంత మహిళల వాల్ట్లో ఫైనల్కు చేరింది. క్వాలిఫికేషన్లో 13.025 పాయింట్లు సాధించింది. ఫైనల్లో 12.883 పాయింట్లతో ఏడో స్థానంలో నిలిచింది.
కామన్వెల్త్ గేమ్స్లో ఆమెకిది తొలి ప్రదర్శన. భారత్ తరఫున ఇదే అత్యుత్తమ ఫలితం. భారత్కు పతక ఆశలు రేపిన ప్రణతి నాయక్ నిరాశపరిచింది. మహిళల వాల్ట్ క్వాలిఫికేషన్లో 12.575 పాయింట్లు మాత్రమే సాధించింది. దీంతో ఫైనల్కు చేరలేకపోయింది. ఒలింపియన్ అయిన ప్రణతికి ఇది నాలుగో కామన్వెల్త్ గేమ్స్. మహిళల ఆల్రౌండ్లో ప్రతిష్ఠా 27వ స్థానంలో నిలిచింది. ఈషితా రేవాలే 28వ స్థానం దక్కించుకుంది. నిష్కా అగర్వాల్ 34వ స్థానంతో ముగించింది.
మహిళల జట్టు 123.000 పాయింట్లతో తొమ్మిదో స్థానంలో నిలిచింది. పురుషుల జట్టు కూడా ఆశించిన ప్రదర్శన చేయలేదు. 208.550 పాయింట్లతో ఏడో స్థానంలో నిలిచింది. తపన్ మొహంతి వ్యక్తిగత ఆల్రౌండ్ ఫైనల్కు చేరాడు. క్వాలిఫికేషన్లో 17వ స్థానంలో నిలిచాడు. ఫైనల్లో 70.100 పాయింట్లతో 15వ స్థానం దక్కించుకున్నాడు. యోగేశ్వర్ సింగ్ రిజర్వ్గా ఫైనల్కు అర్హత సాధించాడు.
కానీ పోటీలో బరిలోకి దిగలేదు. తపేశ్వర్నాథ్ దాస్ క్వాలిఫికేషన్లో 27వ స్థానంతో సరిపెట్టుకున్నాడు. ఆర్టిస్టిక్ జిమ్నాస్టిక్స్లో భారత్ ఇప్పటివరకు మూడు కామన్వెల్త్ పతకాలు గెలిచింది. 2010లో ఆశిష్ కుమార్ ఒక రజతం, ఒక కాంస్యం సాధించాడు. 2014లో దీపా కర్మాకర్ మహిళల వాల్ట్లో కాంస్య పతకం అందుకుంది.
