కాంగ్రెస్ ప్రభుత్వం తెలంగాణ రాష్ట్రంలో ఇందిరమ్మ చీరల(Indiramma Sarees) పంపిణీని ప్రారంభించింది. ముఖ్యమంత్రి రేవంత్ రెడ్డి(Revanth Reddy) బుధవారం నెక్లెస్ రోడ్డులో ఈ కార్యక్రమాన్ని అట్టహాసంగా మొదలుపెట్టారు. గ్రామీణ ప్రాంతాల్లో డిసెంబర్ 9 నాటికి ఈ చీరల పంపిణీ పూర్తి చేయాలన్నది ప్రభుత్వ లక్ష్యం. అయితే ఇందిరమ్మ చీరలు కాంగ్రెస్ పార్టీకి పంచాయతీ ఎన్నికల్లో ఓట్లను రాలుస్తాయా? అన్నది వేచి చూడాలి. నిజానికి గతంలో బీఆర్ఎస్ ప్రభుత్వం బతుకమ్మ చీరల పేరుతో బతుకమ్మ పండగకు చీరలు పంపిణీ చేసింది. కాంగ్రెస్ ఆ పథకాన్ని ఆపేసింది. దీంతో గ్రామీణ ప్రాంతాల్లో కొంత వ్యతిరేకత వచ్చింది. ఇందిరమ్మ చీరల పేరుతో కొత్త పథకాన్ని మొదలుపెట్టింది. డిసెంబర్ చివర్లో రాష్ట్రంలో పంచాయతీ ఎన్నికలు(Local Body Elections) నిర్వహించనున్నారు. ఆ తర్వాత జెడ్పీటీసీ, ఎంపీటీసీ ఎన్నికలకు వెళ్లాలని ప్రభుత్వం భావిస్తోంది. అందుకే ఈ పథకాన్ని హడావుడిగా ముందుకు తీసుకొచ్చినట్టు కనిపిస్తోంది.
మహిళా ఓట్లపై ఫోకస్
గ్రామీణ ప్రాంతాల్లో మహిళా ఓటర్లను ఆకర్షించడం ద్వారా పంచాయతీ ఎన్నికల్లో లబ్ధి పొందాలని కాంగ్రెస్ భావిస్తున్నట్టు కనిపిస్తోంది. నిజానికి ప్రస్తుతం రాష్ట్రంలో మహిళలు కొంతమేర అసంతృప్తిగా ఉన్నారు. మహాలక్ష్మి పథకంలో భాగంగా నెలనెలకు రూ. 2500 ఇస్తామని కాంగ్రెస్ హామీ ఇచ్చానా ఆ హామీని నెరవేర్చలేదు. పైగా కల్యాణ లక్ష్మి పథకంలో ఇస్తామన్న తులం బంగారం విషయంలో ప్రభుత్వం చేతులెత్తేసింది. దీంతో గ్రామీణ ప్రాంతాల్లో కొంత అసంతృప్తి ఉంది. అందుకే ప్రభుత్వం ఈ కొత్త పథకాన్ని హడావుడిగా ప్రారంభిస్తోంది. గ్రామీణ ప్రాంతాల్లో 65 లక్షల మంది మహిళలు స్వయం సహాయక బృందాల్లో ఉన్నారు. ఇక మున్సిపాలిటీల్లో 35 లక్షల మంది ఉన్నారు. అయితే తొలివిడతలో గ్రామీణ ప్రాంతాల్లోని మహిళలకు చీరలు పంపిణీ చేయబోతున్నారు. మరి ఈ చీరల పంపిణీ ప్రభుత్వంపై సానుకూల దృక్పథం తీసుకొస్తుందా? అన్నది వేచి చూడాలి.
చీరల నాణ్యత ఎలా ఉండబోతున్నది?
గతంలో బీఆర్ఎస్ ప్రభుత్వం పంపిణీ చేసిన చీరలపై కాంగ్రెస్ విమర్శలు గుప్పించింది. నాణ్యత లేని చీరలు పంపిణీ చేశారని ఆరోపించింది. ఈ చీరల పంపిణీ పెద్ద కుంభకోణం అని కూడా మండిపడింది. అప్పట్లో బీఆర్ఎస్ పంచిన చీరల విషయంలో మహిళలు కూడా అసంతృప్తిగానే కనిపించారు. మరి కాంగ్రెస్ ప్రభుత్వం పంపిణీ చేయబోయే చీరలు నాణ్యంగా ఉంటాయా? మహిళలు వాటిని నచ్చుతారా? అన్నది వేచి చూడాలి. బీఆర్ఎస్(BRS) పాలనలో పంపిణీ చేసిన చీరల కంటే బాగుంటేనే మహిళల నుంచి సానుకూలత వచ్చే అవకాశం ఉంది. లేదంటే ఈ పథకం బూమరాంగ్ అయ్యి ప్రభుత్వం మీద వ్యతిరేకత కూడా రావచ్చు.
పంచాయతీల్లో నెగ్గితేనే..
జూబ్లీహిల్స్ ఉప ఎన్నికలో గెలవడం ద్వారా సీఎం రేవంత్ రెడ్డి తన వ్యూహాలకు తిరుగులేదని నిరూపించుకున్నారు. అదే ఊపుతో పంచాయతీ ఎన్నికలను ఎదుర్కోబోతున్నారు. అయితే ప్రస్తుత పరిస్థితుల్లో గ్రామీణ ప్రాంతాల్లో బీఆర్ఎస్ శక్తిని కూడా తక్కువ అంచనా వేసే పరిస్థితి లేదు. ఆ పార్టీకి క్యాడర్ బలంగానే ఉంది. కాబట్టి కాంగ్రెస్ ప్రభుత్వం అన్ని అవకాశాలను వాడుకుంటున్నది. గ్రామీణ ప్రాంతాల్లో చీరల(Indiramma Sarees) పంపిణీ, డిసెంబర్ 1 నుంచి 9 వరకు ప్రజాపాలన విజయోత్సవాలను నిర్వహించబోతున్నది. ఈ కార్యక్రమాలు కూడా కాంగ్రెస్ పార్టీకి గ్రామీణ ప్రాంతాల్లో పరోక్షంగా ప్రచారం చేసేందుకు ఉపయోగపడనున్నాయి. మరి కాంగ్రెస్ పార్టీకి ప్రజాపాలన విజయోత్సవాలు, ఇందిరమ్మ చీరల పంపిణీ లబ్ధి చేకూరుస్తాయా? ప్రభుత్వ వ్యతిరేకతను తగ్గించి ఆ పార్టీకి సానుకూల వాతావరణాన్నికల్పిస్తాయా? అన్నది వేచి చూడాలి.
Read Also: పంచాయతీ ఎన్నికల్లో కాంగ్రెస్ వ్యూహమేంటి?
Follow Us on : Pinterest
