కలం, స్పోర్ట్స్: హాంకాంగ్ ఓపెన్లో (Hong Kong Open Semifinals) భారత షట్లర్లు అదరగొట్టారు. పురుషుల సింగిల్స్లో లక్ష్య సేన్, డబుల్స్లో సాత్విక్ సాయిరాజ్-చిరాగ్ శెట్టి జోడీ సెమీఫైనల్లోకి దూసుకెళ్లారు. అయితే మహిళల సింగిల్స్ క్వార్టర్ ఫైనల్స్లో రక్షిత శ్రీ సంతోష్ రామ్రాజ్ ఓటమి పాలైంది. ఈ నెలలో జర్మనీలో హైలో ఓపెన్, గత వారం జపాన్లో కుమమోటో మాస్టర్స్ టైటిళ్లను గెలిచిన లక్ష్య సేన్ తన జోరు కొనసాగించాడు.
సీజన్ ఆరంభంలో తడబడినా, వరుస విజయాలతో ఫామ్లోకి వచ్చాడు. ఈ ప్రదర్శనతో ఐదేళ్ల తర్వాత బీడబ్ల్యూఎఫ్ వరల్డ్ టూర్ ఫైనల్స్కు అర్హత సాధించాడు. సెమీస్లో ఆండర్స్ ఆంటోన్సెన్ లేదా జు జువాన్ చెన్తో లక్ష్య తలపడతాడు. పురుషుల డబుల్స్ క్వార్టర్స్లో ఐదో సీడ్ సాత్విక్-చిరాగ్ జోడీ చైనా జంట హు కే యువాన్-లిన్ జియాంగ్ యిని ఓడించింది.
59 నిమిషాల పోరులో 21-12, 13-21, 21-16 తేడాతో గెలిచింది. సింగపూర్, చైనా ఓపెన్ విజేతలైన భారత జోడీకి ఈ గెలుపు మంచి ఊపునిచ్చింది. సెమీస్లో వీరు డెన్మార్క్ లేదా మలేషియా జోడీతో తలపడతారు. మహిళల సింగిల్స్ క్వార్టర్ ఫైనల్స్లో 19 ఏళ్ల రక్షిత శ్రీ 19-21, 16-21 తేడాతో థాయ్లాండ్ క్రీడాకారిణి పోర్న్పావీ చోచువాంగ్ చేతిలో ఓడింది. అంతకుముందు రక్షిత తన తొలి సూపర్ 500 టోర్నీలో సంచలనం సృష్టించింది.
తొలి రౌండ్లో మియా బ్లిచ్ఫెల్డ్పై గెలిచిన ఆమె, ప్రీ-క్వార్టర్స్లో ఒలింపిక్ ఛాంపియన్ చెన్ యుఫీని ఓడించింది. తను ఆరాధించే చెన్ యుఫీపై 21-18, 24-22 తేడాతో గెలవడం రక్షిత కెరీర్లోనే అతిపెద్ద విజయం. క్వార్టర్స్లో ఓడినా, ఈ టోర్నీ అనుభవం రక్షిత భవిష్యత్తుకు ఎంతో కీలకం కానుంది.

