కలం, వెబ్ డెస్క్ : ఉత్తరాఖండ్ రాజధాని డెహ్రాడూన్‌లోని మొహబ్బెవాలా ప్రాంతంలో ఒక ఘోర రోడ్డు ప్రమాదం (Dehradun Accident) చోటుచేసుకుంది. యూరియా లోడుతో వెళ్తున్న ఒక కంటైనర్ లారీ అదుపు తప్పి ఎదురుగా వస్తున్న కారుని వేగంగా ఢీకొట్టింది. ఈ ప్రమాదం ధాటికి లారీ ఒక్కసారిగా కారుపైనే పల్టీ కొట్టింది. ఈ దుర్ఘటనలో కారులో ప్రయాణిస్తున్న నలుగురు వ్యక్తులు అక్కడికక్కడే దుర్మరణం చెందారు.
మృతులను మిశ్రా కపూర్, ఆయన భార్య నిషా ఆనంద్, తల్లి కిరణ్ కపూర్, నీరజ్‌గా గుర్తించారు. వీరంతా దీపావళి షాపింగ్ పూర్తి చేసుకుని ఉత్తరప్రదేశ్ లోని సహారన్‌పూర్‌కు తిరిగి వెళ్తుండగా ఈ విషాదం జరిగింది. ఈ ప్రమాదంలో కారులో ఉన్న ఆరేళ్ల బాలుడు మహేర్ కపూర్‌కు తీవ్ర గాయాలయ్యాయి. స్థానికుల సమాచారంతో పోలీసులు ఘటనా స్థలానికి చేరుకుని, గాయపడిన బాలుడిని వెంటనే చికిత్స నిమిత్తం సమీప ఆసుపత్రికి తరలించారు.
