కలం, స్పోర్ట్స్: ఫుట్‌బాల్ దిగ్గజం లియోనెల్ మెస్సీ ఒక యువ ఆటగాడిని ఓటుతో ఆశ్చర్యపరిచారు. అండర్-21 ఉత్తమ ఆటగాడికి ఇచ్చే ‘కొపా ట్రోఫీ’ (Kopa Trophy) ఓటింగ్‌లో బైయర్ లెవర్కూసెన్ మిడ్‌ఫీల్డర్ ఇబ్రహీం మాజాకి మెస్సీ తన మూడో ప్రాధాన్యత ఓటును వేశారు. ఈ ఓటింగ్‌లో మెస్సీ మొదటి స్థానంలో లామిన్ యమాల్‌ను, రెండో స్థానంలో పావ్ కుబార్సీని ఎంచుకున్నారు. మొత్తం ఓటర్లలో ఒక్క మెస్సీ మాత్రమే మాజాకి స్థానం కల్పించారు. ఆ ఒక్క ఓటుతోనే మాజా ఓవరాల్ ర్యాంకింగ్స్‌లో తొమ్మిదో స్థానంలో నిలిచారు.
ఈ విషయం వైరల్ కావడంతో తన ఫోన్‌కు పెద్ద ఎత్తున మెసేజ్‌లు వచ్చాయని మాజా తెలిపారు. శనివారం విఎఫ్‌బి స్టుట్‌గార్ట్‌తో జరిగిన మ్యాచ్ తర్వాత ఆయన జర్మన్ పత్రిక ‘కిక్కర్’తో మాట్లాడారు. మెస్సీ వంటి దిగ్గజ ఆటగాడి నుంచి గుర్తింపు పొందడం తనకు దక్కిన గొప్ప గౌరవమని సంతోషం వ్యక్తం చేశారు. 20 ఏళ్ల మాజాను 2025 వేసవిలో హెర్థా బీఎస్‌సీ నుంచి 12 మిలియన్ యూరోలకు బైయర్ లెవర్కూసెన్ కొనుగోలు చేసింది. ఆయన కాంట్రాక్ట్ 2030 వరకు ఉంది.
లివర్‌పూల్‌కు వెళ్లిన ఫ్లోరియన్ విర్ట్జ్ స్థానంలో ఆయన జట్టులోకి వచ్చారు. లెవర్కూసెన్ తరఫున ఆడిన మొదటి 12 పోటీల్లో మాజా 4 గోల్స్ చేసి, 3 అసిస్ట్‌లు అందించారు. మైదానంలో మాజా బంతి నియంత్రణ, డ్రిబ్లింగ్ నైపుణ్యం అద్భుతంగా ఉంటాయి. అల్జీరియా జాతీయ జట్టు తరఫున ఆయన 21 మ్యాచ్‌లు ఆడి 2 గోల్స్ చేశారు. ఆఫ్రికా కప్ ఆఫ్ నేషన్స్, ఫిఫా వరల్డ్ కప్‌లలో కూడా పాల్గొన్నారు.
