కలం, నాగార్జునసాగర్ : నల్లగొండ జిల్లా పెద్దవూర మండలం చింతపల్లి సమీపంలో కలకలం రేగింది. నాగార్జునసాగర్ (NagarjunaSagar) లో లెవల్ కాలువలో గుర్తుతెలియని దుండగులు ప్రమాదకరమైన రసాయనాలను పారబోయడంతో స్థానికులు తీవ్ర ఆందోళనకు గురయ్యారు. కాలువ నీటిలో విచిత్రమైన రంగు, ఘాటైన వాసన రావడాన్ని గమనించిన స్థానిక గ్రామస్థులు వెంటనే అప్రమత్తమయ్యారు. ఎలాంటి ప్రమాదం జరగకముందే అప్రమత్తమైన ప్రజలు, తక్షణమే పోలీసులకు సమాచారం అందించారు.
సంఘటనా స్థలానికి చేరుకున్న పోలీసులు పరిస్థితిని పరిశీలించి కేసు నమోదు చేసుకున్నారు. రసాయనాలను తెచ్చి పారబోసిన దుండగులను పట్టుకోవడానికి కాలువ పరిసర ప్రాంతాలు, ప్రధాన రహదారుల్లో ఉన్న సీసీటీవీ కెమెరాల ఫుటేజీని సమగ్రంగా పరిశీలిస్తున్నారు. తాగునీరు, సాగునీరు అందించే కాలువలో విషపూరిత రసాయనాలు కలపడంపై స్థానికులు తీవ్ర ఆగ్రహం వ్యక్తం చేస్తున్నారు. ప్రజలు, మూగజీవాల ప్రాణాలతో చెలగాటమాడుతున్న ఇలాంటి అసాంఘిక శక్తులను వెంటనే గుర్తించి, చట్టరీత్యా అత్యంత కఠినమైన చర్యలు తీసుకోవాలని డిమాండ్ చేస్తున్నారు. పోలీసులు ఈ ఘటనపై పూర్తిస్థాయి దర్యాప్తు జరుపుతున్నారు.
