కలం, వెబ్ డెస్క్: పదవీ విరమణ చేసి ఏళ్లు గడుస్తున్నా తమకు రావాల్సిన రిటైర్మెంట్‌ బెనిఫిట్స్‌ అందడం లేదంటూ రిటైర్డ్ ఉద్యోగులు (Retired Employees) ఆవేదన వ్యక్తం చేశారు. పెండింగ్‌లో ఉన్న బకాయిలను వెంటనే విడుదల చేయాలని డిమాండ్ చేస్తూ ‘చలో సెక్రటేరియట్‌’ కార్యక్రమానికి పెద్ద సంఖ్యలో తరలివచ్చి నిరసన చేపట్టారు. సచివాలయం వద్ద తమ సమస్యలను ప్రభుత్వం దృష్టికి తీసుకెళ్లేందుకు ఉద్యోగులు ప్రయత్నించారు.
పదవీ విరమణ అనంతరం అందాల్సిన ఆర్థిక ప్రయోజనాలు సకాలంలో అందకపోవడంతో కుటుంబ పోషణ, రోజువారీ ఖర్చుల నిర్వహణలో ఇబ్బందులు ఎదుర్కొంటున్నామని పలువురు ఉద్యోగులు తెలిపారు. కొందరు ఉద్యోగులు పదవీ విరమణ చేసి రెండేళ్లు గడిచినా ఇప్పటికీ తమకు రావాల్సిన బెనిఫిట్స్‌ అందలేదని వాపోయారు. ఉద్యోగ జీవితమంతా ప్రభుత్వ సేవలో గడిపిన తమకు పదవీ విరమణ అనంతరం రావాల్సిన సొమ్ము కోసం నిరసనలు చేపట్టాల్సిన పరిస్థితి రావడం బాధాకరమని పేర్కొన్నారు.
పెండింగ్‌లో ఉన్న రిటైర్మెంట్‌ బకాయిలను చెల్లించడంలో జరుగుతున్న జాప్యాన్ని నివారించాలని ప్రభుత్వాన్ని కోరారు. తమకు రావాల్సిన ఆర్థిక ప్రయోజనాలను వెంటనే విడుదల చేసి, భవిష్యత్తులో ఇలాంటి సమస్యలు పునరావృతం కాకుండా చర్యలు తీసుకోవాలని నిరసనకారులు విజ్ఞప్తి చేశారు. రిటైర్డ్ ఉద్యోగుల సమస్యలపై ప్రభుత్వం సానుకూలంగా స్పందించి బకాయిల చెల్లింపునకు స్పష్టమైన కార్యాచరణ రూపొందించాలని డిమాండ్ చేశారు. పెండింగ్ బెనిఫిట్స్‌ విడుదలయ్యే వరకు తమ సమస్యను ప్రభుత్వం దృష్టికి తీసుకెళ్తామని ఉద్యోగులు పేర్కొన్నారు.
