కలం, ఖమ్మం బ్యూరో : భద్రాచలం రోడ్ రైల్వే స్టేషన్ పేరును తక్షణమే ‘కొత్తగూడెం రైల్వే స్టేషన్’గా మార్చాలని కొత్తగూడెం శాసనసభ్యులు, సీపీఐ రాష్ట్ర కార్యదర్శి కూనంనేని సాంబశివరావు (MLA Kunamneni) డిమాండ్ చేశారు. ఈ మేరకు ఆయన కేంద్ర రైల్వే శాఖ మంత్రి అశ్విని వైష్ణవ్, దక్షిణ మధ్య రైల్వే జనరల్ మేనేజర్‌లకు సోమవారం విడివిడిగా లేఖలు రాశారు.
ఈ సందర్భంగా ఎమ్మెల్యే కూనంనేని సాంబశివరావు మాట్లాడుతూ.. రైల్వే స్టేషన్ పూర్తిగా కొత్తగూడెం పట్టణం నడిబొడ్డున ఉన్నప్పటికీ, దానిని ‘భద్రాచలం రోడ్’ అని పిలవడం వల్ల ప్రయాణికులు తీవ్ర గందరగోళానికి గురవుతున్నారని ఆవేదన వ్యక్తం చేశారు. భద్రాచలం పట్టణం ఈ స్టేషన్‌కు చాలా దూరంలో ఉందనే విషయాన్ని గుర్తుచేస్తూ, కొత్తగూడెం మాత్రమే ఈ రైల్వే సేవల ద్వారా నేరుగా అనుసంధానమై ఉందని వివరించారు. ప్రస్తుత పేరు ఇక్కడి భౌగోళిక వాస్తవికతకు ఏమాత్రం సరిపోవడం లేదని స్పష్టం చేశారు.
ప్రాంతీయ అస్తిత్వాన్ని, ప్రజల ఆకాంక్షలను ప్రతిబింబించేలా రైల్వే స్టేషన్ పేరును కొత్తగూడెంగా మార్చాల్సిన బాధ్యత రైల్వే శాఖపై ఉందని ఆయన పేర్కొన్నారు. భద్రాద్రి కొత్తగూడెం జిల్లా ప్రజల సౌకర్యం, ప్రజా ప్రయోజనాల దృష్ట్యా రైల్వే ఉన్నతాధికారులు ఈ ప్రతిపాదనను సానుకూలంగా పరిశీలించి, వెంటనే తగిన చర్యలు తీసుకోవాలని ఎమ్మెల్యే కూనంనేని విజ్ఞప్తి చేశారు.
