కలం, వెబ్ డెస్క్ : మహారాష్ట్రలోని (Maharashtra) పింప్రి-చించ్‌వడ్ పరిధిలో ఉన్న నిగ్డీ ప్రాంతంలో కలకలం రేపే ఘటన చోటుచేసుకుంది. ఆలయానికి దర్శనం కోసం వచ్చిన ఓ మైనర్ బాలికపై లైంగిక దాడికి యత్నించినట్లు ఆరోపణలు వెల్లువెత్తాయి. ఈ ఘటనకు సంబంధించి మెట్రో నిర్మాణ సంస్థలో పనిచేస్తున్న ఓ ఉద్యోగిపై ఆరోపణలు రావడంతో స్థానికంగా తీవ్ర ఆగ్రహం వ్యక్తమైంది.
నిగ్డీ ప్రాంతంలోని ఓ ఆలయంలో పూజలు చేయడానికి వచ్చిన మైనర్ బాలికపై, అక్కడే మెట్రో పిల్లర్ నిర్మాణ పనుల్లో పనిచేస్తున్న ఒక కార్మికుడు అసభ్యంగా ప్రవర్తిస్తూ లైంగిక దాడికి ప్రయత్నించినట్లు సమాచారం. ఆలయ ప్రాంగణంలో ఏర్పాటు చేసిన సీసీటీవీ కెమెరాల్లో ఈ ఘటనకు సంబంధించిన దృశ్యాలు రికార్డైనట్లు తెలుస్తోంది.
కేసు నమోదు చేసిన పోలీసులు
ఈ విషయం వెలుగులోకి రావడంతో స్థానికులు తీవ్ర నిరసన వ్యక్తం చేశారు. ఆలయానికి వచ్చే భక్తుల భద్రతతో పాటు బాలికలు, మహిళల రక్షణకు తగిన చర్యలు తీసుకోవాలని డిమాండ్ చేశారు. ఘటనపై సమాచారం అందుకున్న నిగ్డీ పోలీసులు వెంటనే స్పందించారు. ఆరోపణలు ఎదుర్కొంటున్న వ్యక్తిని అదుపులోకి తీసుకుని కేసు నమోదు చేసినట్లు సమాచారం. సీసీటీవీ దృశ్యాలను పరిశీలిస్తూ ఘటనకు సంబంధించిన పూర్తి వివరాలను సేకరిస్తున్నారు. బాలికపై జరిగినట్లు ఆరోపణలు ఎదుర్కొంటున్న నిందితుడి పాత్రపై పోలీసులు దర్యాప్తు కొనసాగిస్తున్నారు. కేసు దర్యాప్తు పూర్తయిన తర్వాత మరిన్ని వివరాలు వెల్లడయ్యే అవకాశం ఉంది.
