కలం, స్పోర్ట్స్ : జపాన్‌లోని నాగోయాలో త్వరలో జరగబోయే ఆసియా పారా గేమ్స్‌లో(Asian Para Games 2026) పారాలింపిక్ ఛాంపియన్లు ప్రమోద్ భగత్ (Pramod Bhagat), భవినా పటేల్ (Bhavina Patel) భారత పతాకధారులుగా ఎంపికయ్యారు. ఇటీవల ఐచి-నాగోయా ఆసియా గేమ్స్‌లో భారత్ 21 స్వర్ణాలతో సహా మొత్తం 85 పతకాలు సాధించి నాలుగో స్థానంలో నిలిచింది. అదే విజయోత్సాహంతో భారత పారా అథ్లెట్లు ఈ పోటీల్లోకి దిగుతున్నారు. అక్టోబర్ 18 నుంచి 24 వరకు ఆసియా పారా గేమ్స్ జరగనున్నాయి. అక్టోబర్ 18న జరిగే ప్రారంభోత్సవ వేడుకలో ప్రమోద్ భగత్, భవినా పటేల్ భారత త్రివర్ణ పతాకాన్ని చేతిలో పట్టుకుని అథ్లెట్ల బృందాన్ని ముందుండి నడిపిస్తారు.
పారా బ్యాడ్మింటన్ దిగ్గజం ప్రమోద్ భగత్ 2014 నుంచి 2023 మధ్య ఆసియా పారా గేమ్స్‌లో రెండు స్వర్ణాలు, నాలుగు కాంస్యాలతో మొత్తం ఆరు పతకాలు గెలుచుకున్నారు. పారా టేబుల్ టెన్నిస్ స్టార్ భవినా పటేల్ 2018 నుంచి 2023 మధ్య ఒక రజతం, ఒక కాంస్యంతో రెండు పతకాలు సాధించారు. దేశ పతాకాన్ని మోసే అవకాశం రావడంపై భవినా పటేల్ స్పందిస్తూ.. ఇది తనకు ఎంతో గర్వకారణమని చెప్పారు. జాతీయ జెండాను పట్టుకున్నప్పుడు ఎంతో బాధ్యత గుర్తుకొస్తుందని ఆమె వ్యాఖ్యానించారు. ప్రమోద్‌తో కలిసి జాతీయ బృందానికి నాయకత్వం వహించడం సంతోషంగా ఉందని, మన అథ్లెట్లు అత్యుత్తమ ప్రతిభ కనబరచాలని ఆకాంక్షించారు.
భారత పారా ఒలింపిక్ కమిటీ (PCI) అధ్యక్షుడు దేవేంద్ర ఝఝరియా మాట్లాడుతూ.. ప్రమోద్, భవినాల సాధన, పట్టుదల వారిని ఈ గౌరవానికి అర్హులుగా చేశాయని కొనియాడారు. వీరిద్దరి ప్రయాణం భారత అథ్లెట్లకు ఎంతో స్ఫూర్తినిస్తుందని ఆయన ధీమా వ్యక్తం చేశారు. రేపు, అంటే అక్టోబర్ 8న భారత పారా జట్టుకు పారా ఒలింపిక్ కమిటీ ఘనంగా వీడ్కోలు వేడుక నిర్వహించనుంది. ఈ కార్యక్రమానికి క్రీడా శాఖ మంత్రి డాక్టర్ మన్సుఖ్ మాండవీయ ముఖ్య అతిథిగా హాజరుకానుండగా, సహాయ మంత్రి రక్షా నిఖిల్ ఖడ్సే విశిష్ట అతిథిగా పాల్గొననున్నారు.
