కలం, స్పోర్ట్స్ : విరాట్ కోహ్లీ (Virat Kohli ) తర్వాత వన్డేల్లో నంబర్-3 ఎవరు? ఈ ప్రశ్నకు మాజీ క్రికెటర్ వసీం జాఫర్ సమాధానం ఇచ్చాడు. యువ బ్యాటర్ తిలక్ వర్మను కోహ్లీ స్థానానికి సరైన వారసుడిగా ఎంచుకున్నాడు. 2027 వన్డే ప్రపంచకప్ తర్వాత కోహ్లీ నంబర్-3 స్థానాన్ని భర్తీ చేయాల్సి ఉంటుందని జాఫర్ అభిప్రాయపడ్డాడు. ఆసియా గేమ్స్ ఫైనల్లో తిలక్ తన సత్తా చూపించాడు. పాకిస్థాన్‌తో మ్యాచ్‌లో ఆరో స్థానంలో బ్యాటింగ్‌కు వచ్చాడు. 22 బంతుల్లో అజేయంగా 51 పరుగులు చేశాడు. భారత్ 19 పరుగులతో విజయం సాధించడంలో కీలక పాత్ర పోషించాడు.
తిలక్‌లో ఉన్న బహుముఖ ప్రతిభ జాఫర్‌ను ఆకట్టుకుంది. నంబర్-3లో సెంచరీ చేసిన తిలక్.. ఆ తర్వాత ఐదో, ఆరో స్థానాల్లోనూ బాగా ఆడుతున్నాడని జాఫర్ గుర్తు చేశాడు. వివిధ స్థానాల్లో బ్యాటింగ్ చేయగలగడం అతడి ప్రత్యేకతగా పేర్కొన్నాడు. తిలక్ ఎడమచేతి వాటం బ్యాటర్. దేశవాళీ ఫస్ట్‌క్లాస్ క్రికెట్‌లోనూ అతడి రికార్డు బాగుంది. అందుకే మూడు ఫార్మాట్లలోనూ అతడు సరిపోతాడని జాఫర్ అభిప్రాయపడ్డాడు.
ప్రస్తుతం తిలక్ వయసు 23 ఏళ్లు. టీ20ల్లో ఇప్పటికే భారత్ తరఫున 65 మ్యాచ్‌లు ఆడాడు. 2026 టీ20 ప్రపంచకప్ విజేత జట్టులోనూ ఉన్నాడు. వన్డేల్లో మాత్రం ఇప్పటివరకు ఐదు మ్యాచ్‌లే ఆడాడు. కోహ్లీ (Virat Kohli) తర్వాత నంబర్-3 స్థానానికి మరికొందరు కూడా పోటీలో ఉన్నారు. రుతురాజ్ గైక్వాడ్, ఇషాన్ కిషన్ వంటి పేర్లు ఉన్నాయి. రిషభ్ పంత్ కూడా ఒక ఆప్షన్. అయినా వీరందరి కంటే తిలక్ వర్మనే జాఫర్ తన ఎంపికగా చెప్పాడు.
