క‌లం, స్పోర్ట్స్: ఆసియా గేమ్స్‌లో భారత పురుషుల హాకీ జట్టు (India Mens Hockey Team) చరిత్ర సృష్టించింది. మలేసియాను 5-1తో చిత్తు చేసి స్వర్ణ పతకం సొంతం చేసుకుంది. దీంతో వరుసగా రెండో ఆసియా గేమ్స్ (Asian Games) లోనూ పురుషుల హాకీ గోల్డ్ భారత్ ఖాతాలో చేరింది. మ్యాచ్ ఆరంభం నుంచే భారత్ దూకుడుగా ఆడింది. 11వ నిమిషంలో హర్మన్‌ప్రీత్ సింగ్ పెనాల్టీ కార్నర్‌ను గోల్‌గా మలిచాడు. దీంతో భారత్ 1-0 ఆధిక్యంలోకి వెళ్లింది. అయితే 14వ నిమిషంలో షెల్లో సిల్వీరియస్ గోల్ చేయడంతో మలేసియా స్కోరు సమం చేసింది.
రెండో క్వార్టర్‌లో భారత్ మళ్లీ ఆధిక్యంలోకి వచ్చింది. 23వ నిమిషంలో జగ్రాజ్ సింగ్ పెనాల్టీ కార్నర్‌ను గోల్‌గా మార్చాడు. దీంతో భారత్ 2-1తో ముందంజ వేసింది. ఇదే స్కోరుతో హాఫ్‌టైమ్‌కు వెళ్లింది. మూడో క్వార్టర్‌లో ఇరు జట్లూ గోల్స్ కోసం ప్రయత్నించాయి. భారత్‌కు పలు పెనాల్టీ కార్నర్లు వచ్చినా వాటిని గోల్‌గా మలచలేకపోయింది. అయినా ఆధిక్యాన్ని కొనసాగించింది. నాలుగో క్వార్టర్‌లో భారత్ మ్యాచ్‌ను పూర్తిగా తన చేతుల్లోకి తీసుకుంది. 42వ నిమిషంలో హార్దిక్ సింగ్ పెనాల్టీ స్ట్రోక్‌ను గోల్‌గా మార్చాడు. దీంతో భారత్ ఆధిక్యం 3-1కి పెరిగింది.
ఆ తర్వాత 54వ నిమిషంలో షిలానంద్ లక్రా ఫీల్డ్ గోల్ చేశాడు. దీంతో భారత్ 4-1తో ముందంజ వేసింది. మ్యాచ్ ముగిసే సమయంలో హర్మన్‌ప్రీత్ (Harmanpreet Singh) మరో పెనాల్టీ కార్నర్‌ను గోల్‌గా మార్చాడు. దీంతో భారత్ 5-1తో ఘన విజయం సాధించింది. ఈ విజయంతో భారత పురుషుల హాకీ జట్టు (India Mens Hockey) వరుసగా రెండోసారి ఆసియా గేమ్స్ స్వర్ణం గెలిచింది. ఆసియా గేమ్స్ చరిత్రలో పురుషుల, మహిళల భారత హాకీ జట్లు ఒకే ఎడిషన్‌లో గోల్డ్ సాధించడం కూడా ఇదే తొలిసారి. ఈ రెండు స్వర్ణాలతో భారత్ పురుషుల, మహిళల హాకీ జట్లకు 2028 లాస్ ఏంజెల్స్ ఒలింపిక్స్‌కు నేరుగా అర్హత కూడా లభించింది.
Also Read : చరిత్ర సృష్టించిన ప్ర‌ణ‌వి ఉర్స్‌..!
Follow Us On: X(Twitter)
