కేసీఆర్ నివాసం వద్ద పసుపు నీళ్ల ఘటనపై హైకోర్టు కీలక ఆదేశాలు

కలం, వెబ్ డెస్క్ : ఎర్రవెల్లి (Erravelli) లో మాజీ సీఎం కేసీఆర్ నివాసం వద్ద పసుపు నీటితో రోడ్డును శుద్ధి చేసిన ఘటనకు సంబంధించిన కేసులో హైకోర్టు (TG High Court) కీలక ఆదేశాలు జారీ చేసింది. కేసులో నిందితులను తక్షణం అరెస్ట్ చేయవద్దని స్పష్టం చేసిన న్యాయస్థానం, ముందుగా వారికి నోటీసులు జారీ చేసి దర్యాప్తు కొనసాగించాలని పోలీసులను ఆదేశించింది. ఈ కేసులో నమోదైన సెక్షన్ల ప్రకారం గరిష్ఠంగా ఏడేళ్లలోపు శిక్ష పడే అవకాశం ఉన్నందున, నిందితులను ఏ ప్రాతిపదికన అరెస్ట్ చేస్తారని హైకోర్టు ప్రశ్నించింది.

సుప్రీంకోర్టు మార్గదర్శకాలపై ప్రశ్నలు

ఏడేళ్లలోపు శిక్షకు అవకాశం ఉన్న కేసుల్లో అరెస్టు విషయంలో సుప్రీంకోర్టు ఇప్పటికే పలు మార్గదర్శకాలు ఇచ్చిందని న్యాయస్థానం ప్రస్తావించినట్లు సమాచారం. అలాంటి నిబంధనలు ఉన్నప్పటికీ మళ్లీ అరెస్టులకు ఎందుకు ప్రయత్నిస్తున్నారని పోలీసులను హైకోర్టు ప్రశ్నించింది. దర్యాప్తు ప్రక్రియలో చట్టపరమైన నిబంధనలు, ఉన్నత న్యాయస్థానాల మార్గదర్శకాలను తప్పనిసరిగా పాటించాలని సూచనలు ఇచ్చింది.

కేసీఆర్ నివాసం వద్ద ఘటనపై విచారణ

మరోవైపు ఎర్రవెల్లిలోని కేసీఆర్ నివాసం (KCR Residence) వద్ద రోడ్డును పసుపు నీటితో శుద్ధి చేసిన ఘటనపై పోలీసులు విచారణ చేపట్టారు. ఈ ఘటనకు సంబంధించి గజ్వేల్ ఏసీపీ నర్సింహులు విచారణలో పలు వివరాలను వెల్లడించారు. కేసీఆర్ ఇంటిని ముట్టడించింది దళితులు కాదని, కాంగ్రెస్ నాయకులేనని పోలీసుల విచారణలో తేలినట్లు ఆయన పేర్కొన్నట్లు తెలిసింది.

కాంగ్రెస్ నాయకులు రావడంతోనే శుద్ధి చేశారన్న పోలీసులు

కాంగ్రెస్ నాయకులు కేసీఆర్ నివాసాన్ని ముట్టడించిన అనంతరం అక్కడ పసుపు నీటితో రహదారిని శుద్ధి చేసినట్లు పోలీసులు తెలిపారు. అయితే దళితులు ముట్టడించినందుకు ఈ చర్య చేపట్టలేదని స్పష్టం చేశారు. ఈ ఘటనకు సంబంధించిన పూర్తి వివరాలను సేకరించేందుకు పోలీసులు విచారణ కొనసాగిస్తున్నారు. హైకోర్టు (TG High Court) ఆదేశాల నేపథ్యంలో కేసు దర్యాప్తు ఏ విధంగా ముందుకు సాగుతుందన్న అంశం ప్రస్తుతం రాజకీయ, న్యాయ వర్గాల్లో చర్చనీయాంశంగా మారింది.

Also Read : సుప్రీం కోర్టులో హైడ్రాకు భారీ షాక్

Follow Us On: X(Twitter)