కలం, ఖమ్మం బ్యూరో : ప్లాస్టర్ ఆఫ్ ప్యారిస్ విగ్రహాలు, రసాయన రంగుల వల్ల పర్యావరణానికి జరుగుతున్న హానిని నివారించేందుకు ఖమ్మం నగరంలోని టేకులపల్లి గోశాల నిర్వాహకులు శ్రీనివాస చార్యులు ఒక వినూత్న కార్యక్రమానికి శ్రీకారం చుట్టారు. ఆవు పేడతో వినాయక విగ్రహాలను (Eco-Friendly Ganesh Idols) తయారు చేస్తూ పర్యావరణ పరిరక్షణలో తమవంతు బాధ్యతను చాటుకుంటున్నారు. నీటిలో నిమజ్జనం చేసిన 25 రోజుల్లో ఇవి పూర్తిగా కరిగిపోయి, ఆ తర్వాత మొక్కలకు ఎంతో బలమైన ఎరువుగా ఉపయోగపడటం ఈ విగ్రహాల ప్రత్యేకత.
ఆవు పేడతో పాటు చెక్క పొట్టు, ముల్తానీ మట్టిని తగిన పరిమాణంలో కలిపి 10 అంగుళాల నుంచి 2 అడుగుల ఎత్తు వరకు ఎంతో ఆకర్షణీయమైన విగ్రహాలను రూపొందిస్తున్నారు. విగ్రహాలకు వేసే రంగుల కోసం ఛత్తీస్గఢ్ నుంచి ప్రత్యేకంగా తెప్పించిన నేచురల్ కలర్స్ మాత్రమే వినియోగిస్తున్నారు.
గత ఏడాది ప్రయోగాత్మకంగా 150 ఎకో ఫ్రెండ్లీ విగ్రహాలను తయారు చేసి విక్రయించగా భక్తుల నుంచి మంచి స్పందన రావడంతో, ఈ ఏడాది ఏకంగా 500 ప్రతిమలను విక్రయానికి సిద్ధం చేశారు. భక్తులకు అందుబాటులో ఉండేలా 10 అంగుళాల విగ్రహాన్ని 150 రూపాయలకు, 2 అడుగుల విగ్రహాన్ని 800 రూపాయలకు అందిస్తున్నారు. ప్రకృతిని కాపాడుతూ, భక్తిని చాటుకునేలా గోమయ విగ్రహాలనే పూజించాలని, పర్యావరణ పరిరక్షణకు ప్రతి ఒక్కరూ సహకరించాలని ఈ సందర్భంగా నిర్వాహకులు కోరారు.
