కలం, స్పోర్ట్స్ : పాకిస్థాన్ అండర్-19 (Pakistan Under-19) క్రికెట్ జట్టుకు ఇంగ్లాండ్లో ఊహించని పరిస్థితి ఎదురైంది. మైగ్రెంట్లు ఉన్నారని భావించిన ఆందోళనకారులు.. ఆ జట్టు ఉంటున్న హోటల్ ముందు నిరసనకు దిగారు. ఈ ఘటన మంగళవారం సాయంత్రం పోర్ట్స్మౌత్లో (Portsmouth) జరిగింది. పాకిస్థాన్ యువ జట్టు అక్కడి మారియట్ హోటల్లో బస చేస్తోంది. హోటల్ వద్ద ఆసియా యువకులతో కూడిన ఓ బస్సు కనిపించిందన్న సమాచారం ఆన్లైన్లో ప్రచారం కావడంతో ఆందోళనకారులు అక్కడికి చేరుకున్నారు. దాదాపు 30 మంది గుమిగూడారు. అయితే హోటల్లో ఉన్నది మైగ్రెంట్లు కాదని తర్వాత తేలింది. వారు పాకిస్థాన్ అండర్-19 క్రికెట్ జట్టు సభ్యులని అధికారులు గుర్తించారు.
రీఫార్మ్ యూకే కౌన్సిలర్ జార్జ్ మ్యాడ్విక్ కూడా అక్కడికి వెళ్లారు. హోటల్ సిబ్బందితో మాట్లాడి విషయం తెలుసుకున్నారు. ఆ తర్వాత ఆందోళనకారులకు అసలు విషయం వివరించారు. విషయం తెలుసుకున్న తర్వాత ఆందోళనకారులు అక్కడి నుంచి వెళ్లిపోయారు. పోలీసులు కూడా ఘటనపై స్పందించారు. సుమారు 30 మంది గుమిగూడారని, కొద్దిసేపటికే వారు చెదరిపోయారని తెలిపారు. ఎలాంటి నేరం నమోదు కాలేదని స్పష్టం చేశారు. ఈ ఘటనపై జాత్యహంకార వ్యతిరేక సంస్థలు ఆందోళన వ్యక్తం చేశాయి. మైగ్రెంట్లు, శరణార్థులపై ఉన్న ఉద్రిక్తతలు ఇలాంటి తప్పుదోవ పట్టించే పరిస్థితులకు దారితీస్తున్నాయని పేర్కొన్నాయి.
