కలం, నిర్మల్ బ్యూరో : అసెంబ్లీ ఆవరణలో బీఆర్ఎస్ మహిళా ఎమ్మెల్యేల పట్ల జరిగినట్లు ఆరోపిస్తున్న అవమానకర ఘటనలను నిరసిస్తూ ఆ పార్టీ నాయకులు, మహిళా కార్యకర్తలు నిర్మల్ (Nirmal) జిల్లా కేంద్రంలో ఆందోళన (BRS Protest) చేపట్టారు. మంగళవారం ఆర్డీఓ కార్యాలయం ఎదుట రోడ్డుపై బైఠాయించిన బీఆర్ఎస్ శ్రేణులు కాంగ్రెస్ ప్రభుత్వం, ముఖ్యమంత్రి రేవంత్రెడ్డి (CM Revanth Reddy) కి వ్యతిరేకంగా నినాదాలు చేశారు.
ఈ సందర్భంగా బీఆర్ఎస్ నాయకులు మాట్లాడుతూ.. ప్రజా సమస్యలను ప్రభుత్వం దృష్టికి తీసుకెళ్లేందుకు అసెంబ్లీకి వచ్చిన మహిళా ప్రజాప్రతినిధుల పట్ల వ్యవహరించిన తీరు అభ్యంతరకరంగా ఉందని ఆరోపించారు. మహిళా ఎమ్మెల్యేల గౌరవానికి భంగం కలిగించేలా జరిగిన ఘటనలపై ప్రభుత్వం స్పష్టమైన సమాధానం ఇవ్వాలని డిమాండ్ చేశారు.
మహిళా ప్రజాప్రతినిధులకు గౌరవం ఇవ్వాలి
ప్రజాస్వామ్య వ్యవస్థలో మహిళా ప్రజాప్రతినిధులకు తగిన గౌరవం కల్పించడం ప్రభుత్వ బాధ్యత అని బీఆర్ఎస్ నేతలు పేర్కొన్నారు. అసెంబ్లీ వేదికగా ప్రజా సమస్యలపై మాట్లాడే అవకాశం కల్పించాల్సింది పోయి ప్రతిపక్ష స్వరాన్ని అణచివేసే ప్రయత్నాలు జరుగుతున్నాయని విమర్శించారు. ప్రజా సమస్యలపై ప్రశ్నించే హక్కును హరించేందుకు అధికారాన్ని ఉపయోగించడం సరికాదని అన్నారు. మహిళా ఎమ్మెల్యేల పట్ల చోటుచేసుకున్న పరిణామాలపై సమగ్ర వివరణ ఇవ్వాలని ప్రభుత్వాన్ని కోరారు.
రాష్ట్రవ్యాప్తంగా నిరసనలకు పిలుపు
మహిళా ఎమ్మెల్యేలకు జరిగినట్లు ఆరోపిస్తున్న అవమానాన్ని ప్రజల్లోకి తీసుకెళ్లేందుకు రాష్ట్రవ్యాప్తంగా నిరసనలు కొనసాగిస్తామని బీఆర్ఎస్ నాయకులు తెలిపారు. ప్రజాస్వామ్య విలువలు, మహిళా ప్రజాప్రతినిధుల గౌరవం కాపాడే వరకు తమ ఆందోళనలు కొనసాగుతాయని స్పష్టం చేశారు. నిర్మల్లో జరిగిన నిరసనలో బీఆర్ఎస్ నాయకులు, మహిళా కార్యకర్తలు పెద్ద సంఖ్యలో పాల్గొన్నారు.
