కలం, ఖమ్మం బ్యూరో: ఉద్యోగాలు ఇప్పిస్తామని నమ్మబలికి కోట్ల రూపాయలు వసూలు చేసిన భద్రాచలం (Bhadrachalam Jobs Scam) ఎమ్మెల్యే పీఏ కళ్యాణ్ను సమగ్రంగా విచారిస్తేనే ఈ భారీ కుంభకోణంలో ఉన్న అసలు తిమింగలాలు, సూత్రధారుల జాతకాలు బయటపడతాయని సీపీఐ (ఎంఎల్) మాస్ లైన్ రాష్ట్ర కార్యవర్గ సభ్యులు కెట్చేల రంగారెడ్డి అన్నారు. ఈ మోసం వెనుక ఉన్న పెద్దలను తేల్చేందుకు పోలీసులు విచారణను వేగవంతం చేసి నిందితుడిని కఠినంగా శిక్షించాలని ఆయన డిమాండ్ చేశారు. భద్రాచలం పట్టణంలోని అశోక్ నగర్ కాలనీలో శనివారం నిర్వహించిన ముఖ్య కార్యకర్తల సమావేశంలో ఆయన మాట్లాడారు.
మణుగూరు, బూర్గంపాడు, అశ్వాపురం, పినపాక మండలాలతో పాటు తెలుగు రాష్ట్రాల వ్యాప్తంగా దాదాపు 80 మందికి పైగా నిరుద్యోగులను లక్ష్యంగా చేసుకుని ఈ దోపిడీకి పాల్పడ్డారని రంగారెడ్డి ఆరోపించారు. రిక్షా కార్మికులు, పేద, మధ్యతరగతి కుటుంబాలను సైతం వదలకుండా రూ. 10 లక్షల నుంచి రూ. 30 లక్షల వరకు వసూలు చేస్తూ, మొత్తంగా రూ. 10 కోట్ల వరకు అక్రమంగా దండుకున్నారని మండిపడ్డారు. ఈ అక్రమాలపై పోలీసులకు స్పష్టమైన ఫిర్యాదు అందగా, నిందితుడిని ఇప్పటివరకు అరెస్టు చేయకపోవడం అనేక అనుమానాలకు తావిస్తోందని ఆయన ఆందోళన వ్యక్తం చేశారు. గతంలో ఇసుక ర్యాంపుల అనుమతుల కుంభకోణం మరువకముందే.. ఏ అండదండలు చూసుకుని ఈ స్థాయిలో ఉద్యోగ మోసాలకు తెగబడ్డారో లోతుగా పరిశీలించాల్సిన అవసరం ఉందన్నారు. పోలీసులు బాధితులకు న్యాయం జరిగేలా చర్యలు తీసుకోవాలని, లేనిపక్షంలో బాధితుల తరఫున పెద్ద ఎత్తున పోరాటం చేస్తామని హెచ్చరించారు. ఈ సమావేశంలో సీపీఐ (ఎంఎల్) మాస్ లైన్ నాయకులు కెట్చేల కల్పన, దాసరి సాయి, మునిగేలా శివ ప్రశాంత్ తదితరులు పాల్గొన్నారు.
