కలం, వెబ్డెస్క్: పల్నాడు (Palnadu) జిల్లా పెదకూరపాడులో ఓ ఉపాధ్యాయుడిపై యువకులు అమానుషంగా దాడి చేసిన ఘటన తీవ్ర కలకలం రేపింది. ఉపాధ్యాయుడు జంపని నరేష్ బాబు కారులో గుంటూరు నుంచి పెదకూరపాడులోని పాఠశాలకు వెళ్తున్నాడు. ఈ సమయంలో బైక్ పై వెళ్తున్న యువకులను స్వల్పంగా ఢీకొట్టారు. దీంతో ఈ వివాదం చెలరేగింది. దీనిపై పాఠశాలకు వెళ్లి అక్కడ మాట్లాడుకుందామని నరేష్ బాబు సర్దిచెప్పే ప్రయత్నం చేశారు. అయినా యువకులు వినకుండా ఆయన కారును వెంబడించారు.
అనంతరం పాఠశాల రోడ్డు వద్ద కారుకు బైక్ను అడ్డుపెట్టి ఉపాధ్యాయుడిని బలవంతంగా కిందకు లాగి దాడికి పాల్పడ్డారు. చేతులతో పాటు కొబ్బరి మట్టలతో తనపై విచక్షణారహితంగా దాడి చేశారని బాధితుడు నరేష్ బాబు పోలీసులకు ఇచ్చిన ఫిర్యాదులో పేర్కొన్నారు. ఈ ఘటనపై కేసు నమోదు చేసుకున్న పోలీసులు దర్యాప్తు ప్రారంభించారు.
