కలం, వెబ్ డెస్క్ : దేశంలో వాణిజ్య వినియోగదారులకు కేంద్ర ప్రభుత్వం పెద్ద ఊరటనిచ్చింది. దేశవ్యాప్తంగా కమర్షియల్ గ్యాస్ సిలిండర్ల ధరల (LPG Cylinder Price)ను భారీగా తగ్గిస్తూ నిర్ణయం తీసుకుంది. ఆగస్టు ఒకటవ తేదీ నుంచి అమల్లోకి వచ్చిన ఈ నూతన ధరల ప్రకారం, 19 కిలోల వాణిజ్య సిలిండర్ ధర వివిధ నగరాల్లో గణనీయంగా తగ్గింది. దేశ రాజధాని ఢిల్లీలో కమర్షియల్ సిలిండర్ ధరపై అత్యధికంగా 202 రూపాయల తగ్గింపు లభించింది. అదేవిధంగా కోల్కతాలో ఈ తగ్గింపు మరింత ఎక్కువగా 209 రూపాయలుగా నమోదైంది. తమిళనాడు రాజధాని చెన్నైలో ఇదివరకు 3,106 రూపాయలుగా ఉన్న వాణిజ్య సిలిండర్ ధర, తాజా నిర్ణయంతో 200 రూపాయలు తగ్గి 2,906 రూపాయలకు చేరుకుంది.
అయితే హోటళ్లు, రెస్టారెంట్లు, ఇతర వ్యాపార వర్గాలకు ఈ నిర్ణయం ఎంతో ఊరటనిచ్చినప్పటికీ, సామాన్య ప్రజలకు మాత్రం ఎటువంటి ఉపశమనం లభించలేదు. గృహ అవసరాల కోసం ఉపయోగించే 14 కిలోల డొమెస్టిక్ గ్యాస్ సిలిండర్ల ధరల్లో ఎలాంటి మార్పులు చేయలేదు. ఇంటి వినియోగ సిలిండర్ల ధరలను యథాతథంగా కొనసాగిస్తున్నట్లు అధికారులు స్పష్టం చేశారు. పండుగల సీజన్ ప్రారంభానికి ముందు వాణిజ్య సిలిండర్ల ధరలు తగ్గడం వ్యాపార రంగంలో సానుకూల వాతావరణాన్ని తీసుకువస్తుందని నిపుణులు భావిస్తున్నారు.
