కలం, స్పోర్ట్స్: టీమిండియా సీనియర్ ఆటగాళ్లు రోహిత్ శర్మ, విరాట్ కోహ్లీల భవిష్యత్తుపై మళ్లీ చర్చ మొదలైంది. అయితే, అనుభవజ్ఞులైన ఆటగాళ్లను కేవలం సిక్సర్లు కొట్టగలరనే కారణంతో యువకులతో భర్తీ చేయడం సరైన పద్ధతి కాదంటూ మాజీ క్రికెటర్ మహమ్మద్ కైఫ్ (Mohammad Kaif) సీనియర్లకు మద్దతుగా నిలిచారు. గతంలో ఐర్లాండ్తో జరిగిన వన్డే సిరీస్ను 2-0తో కోల్పోవడంతో పాటు, ఇంగ్లాండ్తో జరిగిన టీ20 సిరీస్లో 4-0తో భారత్ ఘోర పరాజయాన్ని మూటగట్టుకుంది. ఈ నేపథ్యంలో మంగళవారం ఎడ్జ్బాస్టన్లో ఇంగ్లాండ్తో జరిగిన మొదటి వన్డేలో భారత్ విజయం సాధించి మంచి పునరాగమనం చేసింది.
అయితే, ఈ మ్యాచ్లో రోహిత్, కోహ్లీలు రాణించలేకపోయారు. అంతర్జాతీయ క్రికెట్లోకి పునరాగమనం చేసిన రోహిత్ శర్మ 21 బంతుల్లో కేవలం 11 పరుగులు మాత్రమే చేసి సామ్ కర్రన్ బౌలింగ్లో అవుట్ కాగా, విరాట్ కోహ్లీ కేవలం 5 పరుగులకే జోఫ్రా ఆర్చర్ బౌలింగ్లో ఎల్బీడబ్ల్యూగా వెనుదిరిగారు. ఈ ప్రదర్శనతో వీరి భవిష్యత్తుపై మళ్లీ విమర్శలు మొదలయ్యాయి. ముఖ్యంగా రోహిత్ శర్మ వన్డేల్లో సరైన ఫామ్లో లేకపోవడం ఆందోళన కలిగిస్తోంది. ఆయన 2026 లో ఆడిన ఏడు వన్డే ఇన్నింగ్స్లలో కేవలం ఒకే ఒక్క అర్ధ సెంచరీ సాధించారు.
మరోవైపు యువ ఆటగాడు యశస్వి జైస్వాల్ చివరి మూడు వన్డేల్లో రెండు సెంచరీలు కొట్టి జట్టులో స్థానం కోసం గట్టిగా పోటీ పడుతున్నారు. జైస్వాల్ రూపంలో బలమైన ప్రత్యామ్నాయం కనిపిస్తుండటంతో, రాబోయే ఇంగ్లాండ్ మ్యాచ్లు భారత ఓపెనింగ్ స్థానాల ఎంపికలో కీలకంగా మారనున్నాయి. ఈ విమర్శలపై మహమ్మద్ కైఫ్ స్పందిస్తూ… కేవలం సిక్సర్లు కొడుతున్నారనే కారణంతో యువ ఆటగాళ్లను జట్టులోకి తీసుకురావాలనే తప్పుడు ధోరణి నడుస్తోందని అన్నారు.
ఒక విజయవంతమైన జట్టు ఏర్పడాలంటే యువతతో పాటు అనుభవం కూడా సమానంగా ఉండాలని ఆయన అభిప్రాయపడ్డారు. దాదాపు 40 ఏళ్ల వయసులోనూ ఫుట్బాల్ దిగ్గజాలు క్రిస్టియానో రొనాల్డో, లియోనెల్ మెస్సీలు తమ దేశాల తరఫున ఎంతో వేగవంతమైన ఆటను ఆడుతున్న విషయాన్ని కైఫ్ గుర్తుచేశారు. ఆటగాళ్లకు ఫిట్నెస్, ప్రతిభ ఉన్నప్పుడు వయసుతో పనేముందని ఆయన ప్రశ్నించారు. యువతకు ప్రాధాన్యత ఇస్తూనే, అనుభవానికి కూడా సెలక్టర్లు తగిన విలువ ఇవ్వాలని కైఫ్ కోరారు.
