కలం, స్పోర్ట్స్ : భారత స్టార్ జావెలిన్ త్రోయర్ నీరజ్ చోప్రా (Neeraj Chopra) ఈ ఏడాది జపాన్లో జరిగే ఆసియా క్రీడల్లో బరిలోకి దిగనున్నాడు. గతసారి సాధించిన స్వర్ణ పతకాన్ని నిలబెట్టుకోవడమే అతని లక్ష్యం. ఇప్పటికే కామన్వెల్త్ గేమ్స్లో పాల్గొంటానని ప్రకటించిన నీరజ్, ఆసియా క్రీడల్లో కూడా భారత జట్టులో ఉంటాడని అథ్లెటిక్స్ ఫెడరేషన్ ఆఫ్ ఇండియా (ఏఎఫ్ఐ) స్పష్టం చేసింది.
ఏఎఫ్ఐ సెలక్షన్ కమిటీ చైర్మన్ అడిల్లే సుమరీవాల్లా తెలిపిన వివరాల ప్రకారం, నీరజ్ దిగువ వెన్ను గాయం నుంచి బాగా కోలుకుంటున్నాడు. సీజన్ తొలి పోటీలోనే 85.69 మీటర్లు విసరడం మంచి సంకేతమని ఆయన చెప్పారు. ఇప్పటికే అర్హత సాధించిన నీరజ్ కామన్వెల్త్ గేమ్స్, ఆసియా క్రీడలు రెండింటిలోనూ పాల్గొంటాడని వెల్లడించారు.
గత ఆసియా క్రీడల్లో 88 మీటర్లకు పైగా విసిరి స్వర్ణం గెలిచిన నేపథ్యంలో, ఈసారి కూడా అతను మంచి ప్రదర్శన చేస్తాడనే నమ్మకం ఉందని పేర్కొన్నారు. గాయం కారణంగా ఆలస్యంగా సీజన్ను ప్రారంభించిన నీరజ్, దోహా డైమండ్ లీగ్తో ఈ ఏడాది పోటీల్లోకి అడుగుపెట్టాడు. ఆ టోర్నీలో 85.69 మీటర్ల అత్యుత్తమ త్రోతో నాలుగో స్థానంలో నిలిచాడు.
ఈసారి ఆసియా క్రీడల్లో జావెలిన్ పోటీ మరింత ఆసక్తికరంగా ఉండనుంది. గత ఆసియా క్రీడల్లో స్వర్ణం సాధించిన ఛాంపియన్గా నీరజ్ (Neeraj Chopra) బరిలోకి దిగుతున్నాడు. శ్రీలంకకు చెందిన రుమేశ్ తరంగా పతిరాగే ఈ ఏడాది 90 మీటర్ల మార్క్ను దాటడంతో అతను ప్రధాన పోటీదారుడిగా నిలిచాడు. పాకిస్థాన్ ఒలింపిక్ ఛాంపియన్ అర్షద్ నదీమ్ కూడా పోటీలో ఉండే అవకాశం ఉంది. కామన్వెల్త్ గేమ్స్కు ముందు నీరజ్ మరో టోర్నీలో ఆడాలా లేదా అన్న విషయాన్ని అతని కోచ్, వైద్య బృందం నిర్ణయిస్తుందని సుమరీవాల్లా తెలిపారు.
ప్రస్తుతం ప్రధాన లక్ష్యం అర్హత సాధించడం కాగా, అది పూర్తయిందన్నారు. ఇప్పుడు కామన్వెల్త్ గేమ్స్తో పాటు ఆసియా క్రీడల సమయానికి అత్యుత్తమ ఫామ్లో ఉండేలా ప్రణాళిక సిద్ధం చేస్తున్నట్లు చెప్పారు. ఇదే సమయంలో ప్రపంచ అథ్లెటిక్స్ ఛాంపియన్షిప్కు ఆతిథ్యం ఇవ్వాలన్న భారత ప్రయత్నాలు కూడా కొనసాగుతున్నాయి.
2029 లేదా 2031 ప్రపంచ అథ్లెటిక్స్ ఛాంపియన్షిప్తో పాటు 2028 ప్రపంచ అండర్-20 ఛాంపియన్షిప్ నిర్వహణ కోసం అహ్మదాబాద్ తరఫున భారత్ బిడ్ దాఖలు చేసినట్లు ఏఎఫ్ఐ వెల్లడించింది. ప్రపంచ అథ్లెటిక్స్ ప్రతినిధులు ఇప్పటికే అహ్మదాబాద్లోని మౌలిక వసతులు, రవాణా, హోటళ్లు, నిర్వహణ ఏర్పాట్లను పరిశీలించినట్లు తెలిపింది. అయితే లండన్, మ్యూనిక్, కెన్యా వంటి దేశాల నుంచి కూడా గట్టి పోటీ ఉందని పేర్కొంది.
ఆతిథ్య నగరంపై తుది నిర్ణయం సెప్టెంబరులో జరిగే సమావేశంలో వెలువడనుంది. ఆసియా క్రీడలపై కూడా ఏఎఫ్ఐ ఆశాభావం వ్యక్తం చేసింది. గత ఎడిషన్తో పోలిస్తే ఈసారి భారత అథ్లెట్లు మరింత మెరుగైన ఫలితాలు సాధిస్తారని సుమరీవాల్లా తెలిపారు. ఎక్కువ మంది అథ్లెట్లు అర్హత సాధించడం భారత జట్టులో బెంచ్ స్ట్రెంగ్త్ పెరిగిందనే సంకేతమని, ఫెడరేషన్ అమలు చేస్తున్న వ్యూహం సరైన దిశలో సాగుతోందని ఆయన వివరించారు.
Read Also: డేకేర్ లో పిల్ల రాక్షసుడు : 25 సార్లు కొరికి..!
Follow Us On: Instagram
