కలం, వెబ్ డెస్క్ : మారియో.. ఈ పేరు వినగానే అందరికీ చిన్నప్పటి జ్ఞాపకాలు గుర్తుకొస్తాయి. కంప్యూటర్లో ఆడే ఈ గేమ్కు చాలా పెద్ద ఫ్యాన్ బేస్ ఉంది. ఈనాటికీ పీసీ గేమ్స్లో సూపర్ మారియో (Super Mario)కు ప్రత్యేక స్థానం ఉంది. ఈ గేమ్ను ఇద్దరు కూడా కలిసి ఆడొచ్చు. ఇద్దరు ప్లేయర్లకు రెండు అన్నదమ్ముల క్యారెక్టర్లు వస్తాయి. ఒకరి తర్వాత ఒకరుగా ఈ గేమ్ను ఆడతారు. అయితే ప్రముఖ గేమింగ్ కంపెనీ ‘నింటెండో’ సృష్టించిన మారియో పాత్ర పేరు వెనుక ఉన్న రహస్యం ఇప్పుడు సరికొత్త మలుపు తిరిగింది. మారియోకు ఆ పేరు వాషింగ్టన్కు చెందిన వ్యాపారవేత్త మారియో ఆర్నాల్డ్ సెగాలే నుండి వచ్చిందనేది పాత మాటే. అయితే ఇప్పుడు అతని సోదరుడు ‘లుయిగి’ పేరు కూడా ఒక నిజ జీవిత వ్యక్తికి సంబంధించిందేనని తాజాగా బయటపడింది. వంశవృక్ష పరిశోధకురాలు ఎలిసబెత్ జెట్లాండ్ చారిత్రక పత్రాలను అధ్యయనం చేయగా, మారియో సెగాలే తండ్రి పేరు ‘లుయిగి’ అని తేలింది. 19వ శతాబ్దంలో ఇటలీలో జన్మించిన లుయిగి సెగాలే, 20వ శతాబ్దం ప్రారంభంలో అమెరికాకు వలస వచ్చారు. మొదటి ప్రపంచ యుద్ధంలో సైనికుడిగా పనిచేసిన ఆయన, ఆ తర్వాత రైతుగా స్థిరపడ్డారు. లుయిగి కుమారుడైన మారియో సెగాలే పెరిగి పెద్దయ్యాక రియల్ ఎస్టేట్ వ్యాపారంలో రాణించారు.
1980వ దశకంలో నింటెండో సంస్థ మారియో సెగాలేకు చెందిన స్థలాన్ని అద్దెకు తీసుకుంది. ఆ సమయంలో అద్దె చెల్లింపుల విషయంలో వచ్చిన చిన్నపాటి వివాదం వల్ల అక్కడి సిబ్బందికి ఆ వ్యాపారవేత్త గుర్తుండిపోయారు. అలా వారు సృష్టించిన గేమ్ క్యారెక్టర్కు ‘మారియో’ అని నామకరణం చేశారు. అయితే లుయిగి పాత్ర పేరు మాత్రం జపనీస్ పదమైన ‘సిమిలర్’ (ఒకేలా ఉండటం) నుండి లేదా దగ్గరలోని ఒక రెస్టారెంట్ పేరు నుండి వచ్చిందని నింటెండో సృష్టికర్త షిగెరు మియామోటో గతంలో చెప్పారు.
మారియో సెగాలే తండ్రి పేరు లుయిగి కావడం కేవలం ఒక యాదృచ్చికం కావచ్చని పరిశోధకులు భావిస్తున్నారు. ఎందుకంటే లుయిగి పాత్ర వెలుగులోకి రావడానికి ముందే లుయిగి సెగాలే కన్నుమూశారు. ఏది ఏమైనా, ప్రపంచ ప్రఖ్యాతి గాంచిన ఈ గేమింగ్ (Super Mario) సోదరుల పేర్లు ఒకే కుటుంబానికి చెందిన తండ్రీకొడుకుల పేర్లతో సరిపోలడం ఇప్పుడు చర్చనీయాంశంగా మారింది. అయితే మారియో సెగాలే మాత్రం తన పేరు మీద ఉన్న గేమింగ్ క్యారెక్టర్ కంటే తన స్వయంకృషితో సాధించిన విజయాలనే ఇష్టపడేవారు.
Read Also: మంగ్లీని ఫిల్మ్ ఇండస్ట్రీ నుంచి బహిష్కరించండి.. MAAకు ఫిర్యాదు!
Follow Us On: Sharechat
