కలం, వెబ్ డెస్క్ : తెలంగాణలో ఫీజు రీయింబర్స్మెంట్ బకాయిల (Fee Reimbursement) అంశం రాజకీయంగా వేడెక్కుతోంది. విద్యార్థులకు ప్రభుత్వం చెల్లించాల్సిన ఫీజు రీయింబర్స్మెంట్ నిధులు విడుదల చేయాలని డిమాండ్ చేస్తూ బీజేపీ (BJP) చేపట్టిన ఆందోళనకు రాష్ట్ర ప్రభుత్వం స్పందించని నేపథ్యంలో బీజేపీ మరోసారి కాంగ్రెస్ ప్రభుత్వంపై తీవ్ర విమర్శలు చేసింది. విద్యార్థుల సమస్యను పరిష్కరించాల్సిన ప్రభుత్వం తమ పార్టీపై విమర్శలు చేయడం సరికాదని తెలంగాణ బీజేపీ అధ్యక్షుడు రాంచందర్ రావు (Ramchander Rao) మండిపడ్డారు.
బీఆర్ఎస్ హయాంలోనూ డిమాండ్ చేశాం
బీఆర్ఎస్ ప్రభుత్వ హయాంలో బీజేపీ ఫీజు రీయింబర్స్మెంట్ బకాయిల కోసం ఆందోళనలు చేయలేదంటూ సీఎం రేవంత్రెడ్డి (Revanth Reddy) చేసిన వ్యాఖ్యలను బీజేపీ ఖండించింది. గత ప్రభుత్వ పాలనలోనూ ఫీజు రీయింబర్స్మెంట్ బకాయిల అంశాన్ని బీజేపీ లేవనెత్తిందని పేర్కొంది. బీఆర్ఎస్ ప్రభుత్వ చివరి రెండేళ్లలోనే రూ.5 వేల కోట్లకు పైగా బకాయిలు పేరుకుపోయాయని ఆరోపించింది.
బకాయిలు రూ.15 వేల కోట్లకు చేరాయి
కాంగ్రెస్ ప్రభుత్వం అధికారంలోకి వచ్చిన తర్వాత కూడా పరిస్థితిలో మార్పు రాలేదని బీజేపీ విమర్శించింది. తమ లెక్కల ప్రకారం ప్రస్తుత ప్రభుత్వ హయాంలో మరో రూ.10 వేల కోట్ల వరకు బకాయిలు పేరుకుపోయాయని తెలిపింది. మొత్తంగా విద్యార్థులకు చెల్లించాల్సిన ఫీజు రీయింబర్స్మెంట్ బకాయిలు సుమారు రూ.15 వేల కోట్లకు చేరుకున్నాయని బీజేపీ పేర్కొంది.
వెంటనే చెల్లించాలి.. లేకుంటే ఉద్యమం ఉధృతం
విద్యార్థుల భవిష్యత్తుకు సంబంధించిన అంశంపై ప్రభుత్వం రాజకీయ విమర్శలకు తావివ్వకుండా తక్షణ చర్యలు తీసుకోవాలని రాంచందర్ రావు డిమాండ్ చేశారు. పెండింగ్లో ఉన్న ఫీజు రీయింబర్స్మెంట్ మొత్తాన్ని వెంటనే విడుదల చేసి విద్యార్థులకు భరోసా కల్పించాలని కోరారు. సమస్య పరిష్కారంపై ప్రభుత్వం స్పందించకపోతే ఆందోళనలను మరింత ఉధృతం చేస్తామని రాంచందర్ రావు (Ramchander Rao) హెచ్చరించారు.
Also Read : కొండా సురేఖకు మీనాక్షి ఫోన్.. కీలక సూచన!
Follow Us On: Instagram
